Serchhip SP in MJA Member te kawmin an ngaih pawimawh hrang hrang an sawiho
Serchhip SP Pisa-a he inkawmna ah hian Serchhip SP Gavit Gogna chuan Serchhip District-ah mipui nun a ralmuanna atan leh Dan leh thupek te tha taka kenkawh a nih theihna tura Police ten tha taka hna an thawh theihna turin khawtlang mipuite aiawhtu Journalist te nen thawhhona tha tak an neih a beisei thu a sawi a. Chumi atana inkawmna hun tha tak an nei pawh lawmawm a tih thu a sawi bawk a ni.
Serchhip SP thar chuan tunlai khawvel ah Cyber Crime a hluar tawh thu pawh sawiin, hemi kawngah hian mitin an fimkhur a tul thu a sawi a. A bik takin Social Media kaltlanga mi bum tur zawng reng an awm avangin thalaite, a bikin hmeichhia te fimkhur a pawimawh thu a sawi a. Social Media kaltlanga mi an hriatchian loh te chhanlet kawngah fimkhur a tul thu leh hursualna kawnga inbumna a tam avangin hemi kawngah hian fimkhur tlan a tul thu te a sawi bawk.
He hunah hian MJA Serchhip District Member te chuan Serchhip SP thar chu an lo lawm tih sawiin, Serchhip District hmasawnna atana hma an lakna apiangah thawhpui tura an inhuam reng thu an sawi a. Serchhip District tana an ngaih pawimawh hrang hrang te sawiin, Serchhip Bazar-a Police Beat Post awm thin hun rei tak awm mumal tawh lo chu tha taka kalpui leh ni thei se an duh thu an sawi a. Hei bakah hian Serchhip khawpui chhunga lirthei chetvel dan a mumal zawk theihna tura rawtna hrang hrang an neih te pawh sawiin, Serchhip District-ah ruihhlo chu a hluar ve avangin nasa zawka tan lak a tul nia an hriat thu leh District dang atanga ruihhlo rawn lut dang tura nasa lehzuala hmalak a tul nia an hriat thu te an sawi bawk a. Heng an thil sawi hrang hrangah hian a theih anga hmalak a nih tur thu Serchhip SP chuan a sawi bawk a ni.
Serchhip Superintendent of Police (SP) thar Gavit Gogna IPS hi kum 2021 Batch kha niin kum 2023 khan Mizoram-ah a rawn chhuak a, Dy. SP (Crime) hna chelin Aizawl-ah a awm a, hemi hnu hian Champhai-ah SDPO hna chelh lehin Serchhip SP hna chelh tura sawn leh a nih hnuah May 19, 2025 khan a hna thar hi a rawn zawm a ni. Nimin-a MJA Member te a kawmna ah hian SP hi Serchhip SDPO PB. Singh chuan a tawiawm a ni.