PWD Minister hovin Mizoram PWD hnathawh kal mekte thlirhona hun hman a ni

Mizoram PWD hnathawh kal mekte thlirhona (Review Meeting) chu nimin khan Chief Engineer (Highways) PWD Conference Hall-ah neih niin PWD Minister Vanlalhlana chuan he hun hi a hmanpui a ni.

Nimin-a PWD hnathawh kal mek thlirhona hunah hian PWD Minister chuan Mizoram-ah kawngpui enkawltu lian tak tak pathum- NHIDCL, BRO leh PWD an awm laiin PWD chu a ram neitute an nih avangin an chan chhung nilo NHIDCL leh BRO kawngpui chan chhungah pawh PWD chuan a tul phawt chuan tha an thawh mai zel tih a sawi a. PWD chu Department upa a nih angin State chhung hmun hrang hrangah hmunhma an nei tha hlen tih pawh sawiin, “Henga kan building te chu an upa tawhin an awngrawp tawh hle a, Sawrkarin a sak thatna tur a ngaihtuah a ngai hle a ni,” a ti bawk. Minister chuan Community Involvement a pawimawhzia sawiin, Labour thawh thin kan kawngpui enkawl, kawngba sam leh tui luankawr tihfaite hi mipuiin thawk zawk ta se a that zawk a rin thu a sawi a. Aizawl traffic tawt lutuk tih ziaawm dan tur PWD hotulu te nen an ngaihtuah thu leh an hmalakna te chu sawrkarah thlen a, sum hmuh theih dan tur ngaihtuah te pawh a hmachhawp thu a sawi bawk.

Mizoram PWD-ah hian Engineer-in-Chief pakhat, Chief Engineer pali leh Chief Architect pakhat awmin Circle sawm (10) leh World Bank leh Asian Development Bank Projects enkawltu PIU pakhat awmin Division 30 an awm a. Review Meeting-ah hian Chief Architect leh Chief Engineer-te chuan an enkawlna hnuaia hna chi hrang hrangte chu Power Point Presentation hmangin an entir a, sawiho nghal zel an ni bawk.

Mizoram PWD hian kawngpui chi hrang hrang:- National Highways, State Highways, Town & City Roads, Village Roads leh a dangte KM 6731 awmin, Sawrkar Building 2952 leh Lei (Bridge) 129 an enkawl mek a. Hna thawktu post 2180-ah post 870 chu hnawhkhah lohin a awm a, heng zinga post ruak tam ber chu Junior Engineer (JE)-ah Post 158 leh AA/AE/SDO-ah post 65 zet an ni a, hei hian Department chu nasa takin a nghawng tih tarlan a ni a a. Tunah hian AE (Civil) 5 lak phalna nei mekin a dang sawm (10) pawh phalna hmuh mai a beiseiawm thu tarlan a ni bawk.

Mizoram PWD hnathawh kal mekte thlirhona hun hi PWD Commissioner & Secretary K. Lalthawmmawia IAS chuan kaihruaiin Commissioner & Secretary, PWD leh Engineer-in-Chief, PWD te pawhin thu an sawi a. PWD Engineer-te chu DPR siam lai atanga uluk tur te, Quality-ah tan la tur te, Contractor-te harsatna en uluk pui tur leh an hna a that phawt chuan Bill pawh pe zung zung tur te, Court Case reng reng uluk taka zirchiang tur leh hma an lakna kawnga nakina Court Case lo awm thei tur laka fimkhur turte in an chah bawk.