Serchhip-a chhiatna thleng chungchang Bawrhsap hovin thlirho a ni
Serchhip DC Meeting Hall-a thutkhawm ah hian Bawrhsap Paul L. Khuma chuan Serchhip District chhunga khuarel chhiatna rapthlak tak thlengah sawrkar Official te bakah khawtlang hruaitute, tlawmngai pawl te leh mipuite thawhhona tha tak avangin lawmthu a sawi a. “Ruah leh leimin in mihring nunna hial lain chhiatna nasat tak a thlen a, ngai awh leh thei turin sawrkar leh mipuite kan tan tlan zel a ngai a ni,: a ti. He hunah hian SP Gavit Gogna chuan he chhiatna thlenga Serchhip Police te hmalakna sawiin, traffic buapui kawngah te, thihna thleng chungchangah te, sawrkar leh mipui mamawhna apianga an kal thu leh an inhawn reng thu a sawi a. Police in thil thlen dan report an lakkhawm te tarlangin, hriat theih chinah In chhia (fully damaged) 15, Partially damaged 20 (appx.) a awm a. Lirthei chhia pawh Govt Serchhip College Bus, Maruti 800, Tata LGV, Scooty, Sumo leh Scorpio a awm a. Serchip-ah hian mahni chenna In chhuahsan ngai chhungkaw 23 vel an awm tawh a ni.
Nimin-a thutkhawm ah hian Department hrang hrang ten report pe in kawlphetha, tui leh inkalpawhna kawng chungchanga District dinhmun ngaihthlak a ni a. Inkalpawhna kawng chungchangah Serchhip leh Thenzawl inkar chu nimin khan lirthei zawng zawng kaltlang theiha thenfai beisei a ni a, thingtlang khaw kar kawng pawh a tam zawk chu thenfai hman beisei a nih thu Sr. EE PWD chuan a sawi a. NHIDCL hotuten Serchhip by-pass road chu nizan zanlai-ah khan lirthei paltlang thei tura thenfai hman tumin theihtawp an chhuah tih an sawi bawk.
Eng pek kawngah harsatna an tawh dan Sr. EE, Serchhip Power Division chuan sawiin, thirban, LT leh HT ban leh hrui, 32kV Line chat leh tlu a tam a, tuna Eng an pek theih chin bak pek belh tumin tan an la mek a, New Serchhip-a LT ban tlu siam mek niin a that veleh damdawi In chhim lam Sailiam thleng eng pek theih a nih tur thu a sawi a. Thenzawl-ah May ni 30 atangin Eng pek theih a ni tawh lo a. Rei tak an zawn hnuah nimin zing dar 3:00-ah Thenzawl line hi thing tlu in a vaw chhia tih an hmuhchhuah thu leh line thara pawh dan ngaihtuahin a rang thei ang bera Eng pek tumin tan an la tih a sawi a ni.
Tui chungchangah tuilianin PHE pump khawl leh line tam tak a tichhia a, a chim pil bawk avangin harsatna an tawk a. Serchhip a hman tur tui hi ni hnih pump theih a ni tawh lo tih Sr. EE PHE, Serchhip WATSAN Division chuan a sawi a. 11kV powerline chu nimin ah siam zawh hman an inbeisei thu leh tui pump pawh chhunzawm theih thuai an inbeisei thu a sawi a. Ruahsur leh tuilianin a la tihbuai avangin thingtlang lam atangin WATSAN ten harsatna an tawh dan kimchang an la hriat theih loh thu a sawi bawk.
Zawlpui leilet chu tuilianin nasa takin a chim a, inkalpawhna kawng leh lei te a ti chhe bawk a. Agriculture leh Horticulture hotute chuan report kimchang hriat a la nih loh thu sawiin, khaw hrang hrang atangin report a luh mek thu leh zirchianna neih hmabak a la nih thu an sawi a ni.
Tunhnaia ruahsur nasa avanga Ser-chhip khawpui-a chhiatna thleng ah hian DC Office atangin Quick Responsed Team (QRT) te chu a mamawh te hnenah tirhchhuah thin an ni a, QRT te hian leimin avanga bungrua thiarchhuah ngai te leh In chhe tur venna atana Silpouline zar sak hna leh hna tul pawimawh hrang hrangte an thawk thin a. Heng chhiatna thlenna hmun te hi sawrkar mi pawimawh ten a hmunah tlawhin an mamawh ang ang a tul ang zelin an ngaihtuah sak nghal zel bawk.