Chhawmdawl hna thawk mek
Tunhnaia ni thum chhung vel ruahsur avanga chhiatna tuar nasa ber Serchhip Dinthar Veng chuan nimin khan khaw-tlang huap neiin In chhia, luah zui tlak loh te an thiah bakah hmun him lam pan turte bungrua an thiarchhuah sak leh a, mi thahnem tak thawk-chhuakin Serchhip Farm Mual-ah In chhia chu an thiah bakah CMS-a Choka building chhia pawh thiah a ni a, Thumbawk Tuikhur atanga Dinthar Vengsang panna kawng pawh thianin Vawiin hian hnatlang hi neih leh a ni ang.
Serchhip P&E Veng pawhin nimin khan hnatlang nei lehin P&E Veng Lane hnuai-a In chhia senghawi hna an thawk a, P&E Veng YMA hruaitute chuan an huamchhungah hian leimin a tam avangin inkalpawhna lamah harsatna an la tawk nasa hle tih an sawi a, Vawiin hian hnatlang hi neih zui leh tur a ni ang.
Heng Veng pahnih-a hnatlang nei turte hi Serchhip Sub-Hqrs. YMA chuan a tul anga tlawmngaia pui tur Branch an inruat a, Serchhip Dinthar Branch-ah hian Serchhip Kawnpui South, Serchhip Vengchung leh Serchhip Field Veng Branch te thawkin P&E Veng-ah hian Serchhip Kawnpui North Branch leh Chhekhnai Branch te an thawk dawn bawk a ni.
Tunhnai ruahsur nasa avanga Serchhip Chanmari Veng panna kawngpui pathum leimin in a hnawh te chu nimin tlai khan lirthei kaltlang theih tura thenfai vek a ni a. Serchhip Bilzel-a leimin in kawngpui a hnawh pawh thenfai nghal zel niin harsatna a thleng zui rih lo a, Serchhip P&E veng kaltlanga AOC Veng leh IOC Veng inkalpawhna pawh thenfai a ni tawh bawk a ni.
Serchhip atanga Aizawl lam panna leh Lunglei lam panna bakah Thenzawl panna kawng te pawh thenfai a ni tawh bawk a, ruah a sur leh a nih loh chuan harsatna thleng zui lutuk tawh rih lo tura beisei a ni.