Sawrkar in sum an la sawi chhuak lo niin sawi

Zonuna Kawlni (LENKAWL) • June 17, 2025 • Comments • Mizoram

MNF Vice President Lalchhandama Ralte chuan ‘Financial Management thiam’ inti ten manage tur sum an la sawi chhuak lo niin a sawi.

MNF Party in Mizo Hnam Run Chhung Inkhawm nimin-a an neih ah MNF Vice President Lalchhandama Ralte chuan, “Kum khat leh a chanve an kal hnuah tha bik, fel bik, Financial Management thiam bik nia insawite hian Delhi tlangah project umchhuah hlawhtling an neih kan la hre lo,” tiin “Share of Taxes, puk chawp, CSS pangngai lo kal bak manage tur an la nei lo. SASCI sum an ti-lapse a, heti chungin Finance Minister-in balance cheng vbc. sang chuang nei anga a sawite hi a mak. State sum hmuhna pawimawh tak GST-ah ni se nikum nen khaikhinin (year-over-year) kumin ah January – May chhung minus hlirin an kal a. Thenawm ram buai Manipur pawh May 2025 khan 102% GST Collection an nei theih laiin, Mizoram chu -26% a ni. He (ZPM) sawrkar performance hi a chhe hle a ni,” a ti a. “Sum pawhluh an nei lo a, sum chevel tur a awm lo,” a ti bawk.

Lalchhandama Ralte chuan tunhnaiah MPCC President-in MNF OB-te a beih chiam thu leh amah pawh mimal taka beih a nih thu sawiin, an puhna chu thudik a nih loh thu leh beih tham dinhmuna Pathian in a dintir avangin lawmawm a tih thu a sawi a, he inpuhna hi thudik a ni sela chuan ram rawngbawl zel tlaka a inngaih loh thu a sawi bawk.

Leader of Opposition Lalchhandama Ralte chuan Zirtirtu thenkhat ten harsatna an tawh chungchang pawh sawiin, “Sawrkar hmasaa MR Teacher lakte kha tam tak chu NIOS (Open School) atanga D.El.Ed pass an ni a. Tuna MTET exam tura tih an nih hian harsatna an tawk chho mek a. Anniho chungah hian khawngaihna kan lantir deuh a ngai a, hun kan pek pawh a tha hle mai tih hi kan sawrkar hnenah pawh kan ngensak bawk a ni,” a ti bawk.