Result tihchhuah har thu MSU in MPSC-ah an thlen

Zonuna Kawlni (LENKAWL) • June 17, 2025 • Comments • Mizoram

Mizo Students’ Union (MSU) General Hqrs. hruaitute chuan nimin khan Mizoram Public Service Commission (MPSC) Chairman leh Secretary hmuin hnalak exam result tihchhuah har chungchang an zawtfiah.

MSU thuchhuah in an tarlan danin nikum (2024) July 29 leh July 31-a State Tax Officer leh Co-operative Audit Officer lak tawh, thla 10 hnu pawha Exam Result la chhuak lo leh Common Competitive Exam nikum December 17-a neih tawh result la chhuaklo chungchang chu MPSC Chairman leh Secretary hnenah hian an zawtfiah a. Mizo thalai exam beituten hna dang an exam lehna tur kawngah harsatna a siam avangin heng exam result te hi a rang thei ang bera tichhuak turin an ngen a ni.

MPSC Chairman hian heng hnalak kal mekte hi Evaluator lamah harsatna tlemte an neih avanga tichhuak har an nih thu MSU hruaitute hi a lo hrilh a, karleh June ni 27, 2025 (Zirtawpni) ralhmaa Exam result tihchhuah an tum ngei thuin a lo chhang niin an sawi bawk a. MSU chuan MPSC hotute thu hi ngaihchan hmasak tha an tih thu sawiin, June 27, 2025 ralhmaa exam result hi a chhuah ngei an beisei thu leh an ngaihven reng dawn thu an sawi bawk a ni.