MUHCS an zawm chho mek lawmawm tih thu sawi

Health Minister Lalrinpuii chuan Private Hospital leh Clinic hmun hrang hrang a miten MUHCS an zawm chho ta mek chu lawmawm a tih thu a sawi.

ZPM Party Chhung Inkhawm nimin-a neih ah Health Minister Lalrinpuii chuan Health Care Scheme chungchang hi sawiin, “Sawrkar hmasa hunlai a Health Care kha bill a tang rei thin hle a, mipuiin an ring zo tawh lo a, inziaklut duh pawh an tlem tial tial a, phunnawina a tam hle a ni,” a ti a. Hei bakah hian Mizoram Private Hospital te duhthusam Scheme kalpui niin kum 5 chhung (April 2020-March, 2025)-a Sawrkarin Mizoram Private Hospital te hnena mipui damlo kaltlanga sum a pekchhuah zawng zawng kha vbc. 446.92 niin hemi zinga vbc. 250.09 lai chu Sawrkar hnathawk damlote bill a nih thu sawiin, “Sawrkar sumin a daih leh si lo a, harsatna lian tak tawkin leiba tam tak min hnutchhiah a, kan Sawrkar tirh te pawh khan Health Care Bill ba pek nan Chief Minister in sum tam tak a thehchhuah angai hial a nih kha,” a ti.

Kalphung thar mipui Sawrkar chuan hetiang Health Care hi neih ve an hlauh avangin inthlan hma khan Mipui tan Cashless Health Care Scheme an duan thu leh Sawrkarna an chelh veleh zirchianna uluk taka neiin MUHCS chu kumin April ni 1 atanga mipui tan hman theihin an chhawpchhuak thei ta chu thil lawmawm tak a ni tih a sawi a. “Aizawl Private Hospital te nen pawh theih ang ang a inrawn lawk a ni chungin rate chungchanga an buailoh thu sawi mah se Cashless an pawm theih loh thu an sawi a. Private Hospital te hi sumdawng an nih angin Sawrkar ruahmanna an pawm thei lo hi kan hrethiam lutuka, an thutlukna hi a zahawm kan ti viau a ni,” tiin “Chutih rualin Vawiin ah chuan Private Hospital leh Clinic hmun hrang hrang a miten min zawm chho ta mek hi lawmawm kan ti a, Phai lama Private Hospital lian leh lar tak takte nen pawh MoU kan sign chho zel a, Synod Hospital pawh hian mipuite hmangaihna avangin MUHCS hi min zawm thuai kan beisei tlat a ni,” a ti bawk.

Health Minister chuan tunah chuan Health Department ah kalphung thar a thleng ta tih pawh sawiin, “Health Care hmasa a step 10 vel kha step 2 ah kan pawt tawi ta a ni. Tunah chuan chhungte pawisa puk ngai lo in Empanelled Hospital-ah pawisa sen ngai miah lovin Cilvil Hospital leh ZMCH-ah rei tak nghak lovin phailam-ah pawh a inenkawl zung zung theih tawh a, Vawiin thlenga phailamah kan refer MUHCS zarzo tawhte hi mi 825 lai an tling tawh a ni. Sawrkar damdawi In hrang hrang te thuamthat mek a ni a, PHC leh CHC te pawh mipuite tan kan thuamtha mek bawk a ni. Heng Sorkar hmalakna te hriain MUHCS hnuaiah mipui inziaklut kan thahnem ta hle a, Mizoram chhunga Ration Card awm zawng zawng 2,89,236 atanga chhut phei chuan MUHCS registration ah hian kan hlawhtling hle in ka hria,” a ti bawk.