Sawrkar in inkalpawhna kawngpui ah hma la mek zel

Prime Minister Narendra Modi kaihhruai sawrkar kum 11 chhunga hmalakna hrang hrang zingah Mizoram-ah pawh inkalpawhna lama ram rotling tam tak siam a ni tawh.

Mizoram chhungah National Highway kawngpui kilometre 1,000 chuang sial a ni tawh a, chung zingah chuan National Highway Infrastructure Development Corporation Limited (NHIDCL)-in kilometre 620 chu an zofel tawh a. Kum 4 kalta chhung pawh khan km 620 a thui kawng siamna atan hian NHIDCL hian cheng vbc. 13,000 zet an seng a. Hei bakah hian NHIDCL-in hna an thawh chhunzawm zelna turin cheng vbc. 6,400 chu tihfel a ni leh tawh a, hna hi tan thuai tura ruahman a ni.

Hna lian leh pawimawh thawh tawh zinga langsar zualte chu Aizawl leh Tuipang inkar kawngpui leh Seling leh Champhai inkar kawngpui te a ni a. Heng kawngpui siamte hian thenawm ram Myanmar leh Bangladesh bakah thenawm State Assam, Tripura leh Manipur te nena inkal-pawhna a tichangtlung a, zin veivakmite tana awlsamna a nih rualin insumdawntawnna kawngah pawh a thawh hlawk dawn a ni.

Heng bakah hian Aizawl pumpelh (bypass) kawngpui pahnih - khawchhak lam leh khawthlang lama siam hna buaipui mek ni bawkin khawchhak lama km 34 leh metre 500-a thui kawngpui siam hna hi Bharatmala Pariyojana ruahmanna hnuaiah cheng vbc. 2,300 ruahmanin NHIDCL in an thawk tan mek a, he kawngpui-ah hian leiverh km 2 leh a chanve zeta thui a awm dawn a ni.

Hei bakah hian Khawthlang lama Aizawl pumpelh km 45 a thui kawngpui siam hna hi PM-DevINE hnuaiah cheng vbc. 500 sengin Mizoram PWD-in an thawk a. Heng kawngpui pahnihte hi kum 2028 khian mipui hman tangkai tura zawhfel hman tum a ni.