Ruahsur nasa avanga tuilian in harsatna thlen mek

Tunhnaia ruahsur nasa avanga Tuilian leh mekah Tlabung, Bairabi leh Sairang-ah chhungkaw za dawn chu hmun him lamah thiarchhuah a ni tawh.

Tunhnaia ruahsur avangin Khawthlangtuipui in len lam a pan zel a, Tlabung khaw chhung bikah niminpiah lama inthiarchhuak chhungkaw 12 bakah nimin khan chhungkaw 10 chuangte chuan an chenna In chhuahsanin hmun him lamah an inthiar-chhuah belh leh a, hetihlai hian Tlabung Sub-Division huamchhunga Tippereghat khuaah Bazar awmna hmun bawr vela chhungkaw 30 chuang chuan hmun him lam panin an chenna an chhuahsan tawh bawk. 

Hei bakah hian Tlawng lui tui pawh a len avangin Kolasib District-a Bairabi khua chuan an tuar tan mek a, nizan hmasa khan Bairabi khua hmun hniam lai deuh chu tuiin a chim tan leh a, tui chim mai hlawuhthawnawm chhungkaw 25 te chu an bungrua nen an insenghawi a ni. Tlawng tuilian in a nghawng - Bairabi hmun hniam laia Leilet, huan thlai leh Sangha Dil engemaw zat chu tuilian hian a chim tawh a, Tlawng lui kama Leipui leh Nul hmun tam tak te phei chu tuilian hian a hrut chhe hneh hle bawk. 

Hetihlai hian Sairang Tlawng lui in a chim chin pawh a san zel avangin lui hnaiha awm, In chim hlauhawm te chu hmun him lamah an inthiar chhuak a, Sairang VC Secretary sawi danin tun dinhmun ah chhungkaw 15 te chu thiarchhuah an ni tawh a, chhungkaw tam zawk chuan an chhungte In ah an bungrua an dah rih a, chhungkaw pali erawh chuan VC Hall-ah an dah thung a ni. Sairang VC Secretary sawi danin, Tlawng Lui len dan hi tun hnai chho a ri buan buan ang erawh a ni tawh lo a, hetihlai hian tui chim chin sang zel hian lui kama thlai chinte erawh a tichhe nasa hle a ni. Ruahsur hi a ziaawm chhoh chuan tuilian pawh hi ziaawm leh mai tura beisei a ni bawk.