Garbage Free City Lunglei Project kalpui tur hawng

Bawlhhlawh awm lohna khawpuia Lunglei siam tura hmalakna, 'Garbage Free City Lunglei Project' kalpui tur chu nimin khan Health & Family Welfare Minister Lalrinpuii chuan Lunglei Convention Centre Convention Hall-ah a hawng.

Garbage Free City Lunglei Project hawngtu Minister Lalrinpuii chuan LMC hotute'n hmathlir thui tak neia bawlhhlawh awm lohna khawpui siam tura ruahmanna an nei chu lawmawm leh phurawm a tih thu sawiin, a hlawhtlin nan sawrkar leh mipui thawhhona tha tak neih a pawimawh dawn tih a sawi a. Garbage Free City Project kalpui turah chuan chhungkaw tina nute chu a pawimawh hmasa an nih tur thu sawiin, bawlhhlawh thliarhran leh sawngbawl chu nuho in choka atanga an tan a, chhungkuaah bawlhhlawh paih dan dik leh faina chungchang an inzirtir chuan a hlawhtlingin, a rah chhuah hmuh tur a awm thuai ang, a ti a. Khawpui fai ni turin bawlhhlawh siamtu leh leilung tichhetu plastic ang chi te hman tlem a, a hman nawn theih hman nawn a, a thehthang kawngah fimkhur a tul thu sawiin, tui chhawp nan plastic bur aia saidawium hman te, bazar-na ah plastic bag leh polythene hmang lova Em emaw, bazar ip pangngai emaw hman hram hram te a pawimawh thu a sawi a. Kuhva khungna sarang, chinai leh kuhva eina nawi leh chil te thlahdah lova khawlaia bawlhhlawh bawm hunte hman tangkai leh enkawl zui a pawimawh thu te sawiin, Lunglei khawpui chu khawpui fai, thianghlim, mawi leh nuam a nih theih nan khua leh tui zawng zawngte tangruala theihtawp chhuah turin a chah bawk.

Lunglei khawpui chhunga faina leh thianghlimna kawnga hma lakna hi Local Administration Department-in kengkawh thinin, Urban Development & Poverty Alleviation (UD&PA) chuan a chhunzawm a. Lunglei Municipal Council (LMC) din a nih hnuah bawlhhlawh sawngbawl chu LMC subject a nih angin LMC chuan hma a la zui a. Hemi zulzui hian Municipal Sanitation Committee chuan Garbage Free City Project kalpui tura rawtna siamin, LMC Board of Councillor meeting chuan May ni 2, 2025 khan a pawmpui a, ruahmanna siam zui a ni ta a ni.

Garbage Free City Lunglei Project hi kumin 2025 hian LMC Award 2024-a Ward faia thlanchhuah ward pali - Ward number I, II, IX leh XI-ah te pilot project anga kalpui hmasak tura ruahman niin, heng Ward chhungah hian Veng (Local Council) pakua - Pukpui, Zotlang, Serkawn, Zohnuai, Lunglawn, Salem, Zobawk North, Zobawk South leh Lungpuizawl te an awm a. Pilot project atan hian cheng nuai 60 vel ruahman a ni a. Kumtin Ward dangah kalpui belh zelin, kum 3 chhungin Ward 11 tuam chhuah tum a ni a. Kum 2026-ah Ward No. III, VI, VII leh VIII tih belhin, kum 2027-ah Ward No. IV, V leh X-ah te hma lak belh a ni ang.