CM hovin ILP leh Railway Police chungchang sawiho

Nimin khan Chief Minister Lalduhoma hovin ILP leh Railway Police chungchang sawihona neih niin Home Minister K. Sapdanga leh Official pawimawh te an tel.

Chief Minister Pisa-a he sawihona hunah hian ILP Guidelines thlirletin a thar tih belh tur rawtna te, Online ILP Phase 2 kalpui dan tur te, Permit in a phal chin baka rei lo cham ru te dapchhuahna leh Railway Police dinna tur chungchang te an sawi a. Home Department changtu Secretary Vanlalmawia chuan Online Inner Line Permit kalpui mek chungchang sawifiahin, tih belh emaw siam that ngai, Deputy Commissioner zawng zawngte atanga rawtna an dawn te pawh a tarlang bawk.

He hunah hian  Online ILP portal kalpui dan tur chu ICT-a Informatics Officer, Lalrinfela chuan a entir (demonstrate) thung a. A kalpui dan tur tha zawk nia an ngaih te an sawiho nghal zel niin ILP hi Online veka kalpui theih a la nih loh avangin hmun thenkhatah chuan tunhmaa kal dan (off line) anga kalpui a la ni.

DP&AR lam chuan a thuphungin Railway Police dinna hi a pawm tawh a, zirchianna neih chhoh mek a ni a. Sairang Rel Station hi June thla chanve velah chuan hawn theiha peih a ni mai tawh dawn a, a rang lama hmalak a tul nia sawi a ni bawk.