Republic YMA in an lawm

Aizawl Republic Veng Branch YMA chuan LBS Suzuki 22nd Inter Branch YMA Football 2025-a an Champion leh YMA Day lawmna Inrinni khan neiin Sports Minister Lalnghinglova Hmar chuan a hmanpui a ni.

Republic Veng Community Hall-a he hun hman ah hian Sports Minister Lalnghinglova Hmar chuan Mizo player-ten ISL Season hmasa khan minute an nei tam ber tih sawiin, I-League ah phei chuan an tam fal hle tih a sawi a. Chutihrualin Football chu mi zawng zawng eizawnna tur a ni lo tih sawiin, “Talent nei tha zawng zawng an thleng sang chuang lo a, vanneih tel a ngai. Lehkha thiam hi eizawnna chu a ni,” tiin zirna leh infiamna kaihkawp thiam a pawi-mawh thu a sawi tel bawk.

Republic Veng Branch YMA hian zirlai titha chawimawina a nei nghal a, Rajya Sabha MP K. Vanlalvena chu Uaptu niin Agriculture Minister PC Vanlalruata, AMC Ward No. XVII Corporator David Zohmangaiha bakah Central YMA hruaitute pawhin an telpui a. Agriculture Minister chuan, “Social Media leh tunlai thiamna pung zel vangin khawsak phung a danglam chho a, hetianga hun inthlak vel hi Mizoten an paltlang thei a nih chuan YMA a vul zel ang,” a ti a. Rajya Sabha MP K. Vanlalvena pawhin hlawhtling tur chuan thawhrimna a pawimawh thu leh Infiamna ni lo ah pawh hlawhtling tur chuan thawhrimna a pawimawh ber thu a sawi a. Central YMA President Lalhmachhuana chuan Branch YMA a chak chuan vengchhung an inlungrual thin tih a sawi a. AMC Corporator David Zohmangaiha chuan an Veng-ah thil tha dahna atan hmun an la neih thu te a sawi bawk.

Republic Veng hi kum 2005 khan Central YMA Football-ah an champion tawh a, kum 20 hnuah Champion lehin Republic Veng Captain Lalnunzira chu Best Player-ah thlan a ni a, Goalkeeper RS Lallawmzuala chu Best Goalkeeper atan thlan a ni bawk.