PMAY-G ah tanpuina dawng 26,966 awm tawh

Zonuna Kawlni (LENKAWL) • June 16, 2025 • Comments • Mizoram

Sawrkar laipui hmalakna - Pradhan Mantri Awaas Yojana - Gramin (PMAY-G) hnuaiah Mizoram-ah Insak tanpuina dawngtu chhungkaw 26,966 an awm tawh.

Thingtlang mirethei In sak tanpuina dawng zinga chhungkaw 25,011; za zela 83.46 chuan In sa zo tawhin Lunglei District-a tanpuina dawng te chu sa zo hnem ber niin an zingah za zela 98.51-in sa zo tawh a. PMAY-G hnuaia Insak tanpuina dawng turte hi Socio Economic Caste Census 2011 (SECC) data atanga thlan a ni a. PMAY-G hi sawrkar kum 2016-17 atanga hman a nih chauh avangin SECC 2011 Survey hun laia beneficiary-te chu In tha nei tawh te, Pêm tawh te, thi tawh leh In tha mamawh si list-a chuang ve lo tam tak an awm tih hmuhchhuah a ni. Hei vang hian kum 2018 khan SECC 2011 Survey list-a awm ve lo, In tha mamawh si te tan Awaas+Survey a kalpui leh bawk.

Rural Development Department hotute chuan Insak tanpuina atan sawrkar laipui atangin sum an hmu that tih an sawi a, tunah hian State Nodal Account atangin sum hman zawh tawh ni mah se, Ministry atangin cheng vbc. 12.9475 dawn tawh a ni a, sawrkar Treasury-ah la awm mekin, sum dawn a nih veleh tanpuina sem leh thuai beisei a ni.