Mizoram Grassroot Badminton League khel zo

Mizoram Grassroot Badminton League 2024-2025 kharna chu Inrinni khan neih niin Sports Minister Lalnghinglova Hmar chuan a hmanpui a ni.

Mizoram Badminton Centre, Zuangtui-a he hun hman ah hian Sports Minister Lalnghinglova Hmar chuan kum 2036-a India in Olympic thlen a tumah Mizoram thalai te a tam thei ang ber an tel theih nan hmalak chho mek zel a nih thu leh Sorts discipline hrang hrang zingah Badminton chu Mizote tan India leh khawvel Level-ah kan lan theihna a nih a rin thu leh Olympic-ah ngei pawh kan inlan theihna discipline pakhat a nih a beisei thu a sawi a. Tun dinhmunah pawh India aiawh tura H. Lalthazuala leh C. Lalramsanga te thlan an nih thu sawiin, anmahni ang dinhmun a ding thei thalai tam tak chherchhuak thei dinhmun ah MBA a din mek thu a sawi bawk.

He hunah hian Badminton Association of India Vice President leh National Badminton Chief Coach ni bawk, Pullela Gopichand pawhin kum 1994-ah India Badminton in a hun tawn hniam ber a tawn thu sawiin, Commonwealth Games-ah pawh sawrkar laipui in player a tirh loh thu a sawi a. Chumi hnuah kalphung mumal tak nena Coaching kalpui a nih thu te, kum 30 dawn a ral leh meuh chuan India in World No. 1 thleng phak pathum a neih thu te, World Championship 15 a lak theih thu te a tarlang a. Mizoram-ah ngei pawh kum 2017-2018 inkar atangin kalphung mumal tak neia training kalpui tan niin kum 5 a liam deuh choh chungin Mizoram chuan India Team a tel thei player pahnih a neih thu a sawi bawk.

Mizoram-ah Grassroot Centre 25 kalpui mek a ni a, chungah chuan training nei mek naupang 1095 awmin, mipa 694 leh hmeichhia 401 an awm a. Champhai leh Kolasib-ah Elite Centre a awm mek a, heng ah hian player 27 (mipa 14 leh hmeichhia 13) an inzir mek a. Hei bakah hian Regional Competitive Training Centre, Zuangtui ah full time a training nei mi 25 an awm bawk. Report atanga tarlan a nih danin, tun dinhmun ah Mizoram chhungah District Badminton Association 13 a awm a, Club 220 in affiliation tiin, Player 9729 in heng Club-ah te hian registration an ti a ni.

Mizoram Grassroot Badminton League 2024-2025 ah hian Chhinga Veng Grassroot Centre chu pakhatna niin Saron Veng Grassroot Centre leh Mission Veng Grassroot Centre ten an dawt a. Grassroot League Final khelh hrang hrangah Lalruatkimi, New Serchhip GRC chu Under-11 Girl's Singles-ah Champion in Abraham Lalnunthara, New Serchhip GRC chu Under-13 Boy's Singles-ah a Champion bawk a, Abraham Lalnunthara leh Lalthakimi te chu Under-13 Mixed Doubles-ah Champion in Under-13 Girl's Singles-ah Lalthakimi hi pahnihna a ni bawk.