Ranvulhtute tana Insurance kalpui dan tur sawiho

Bana Kaih Scheme kaltlanga ranvulh lama hmalak tumte tan Insurance kalpui dan tur chungchang sawihona chu nimin khan Planning & Programme Implementation Committe Room-ah neih a ni.

He sawihona hi Mizoram State Policy Coordination Committee-a Vice Chairman KC. Lalmalsawmzauva chuan kaihruaiin Bana Kaih Scheme kaltlangin Animal Husbandry & Veterinary Department hnuaiah hmalakna kalpui tum mi thahnem tak an awm thu leh heng hmalaknate hi hmasawnna thlentu a nih theih nan awmze nei taka kalpui a tul thu a sawi bawk.

National Insurance Company Limited-a thawktute tarlan danin NICL chuan Mizoram-ah May ni 24, 2022 khan MzSRLM leh Animal Husbandry & Veterinary Department nen insurance kalpui turin inremna thuthlung a lo siam tawh a. Kum thum chhungin ran insurance-na sum cheng nuai 67.8 a lo pechhuak tawh a ni. Vawk Insurance kalpuina hi a tawp tawh avangin tharthawh lehna turin hmalak mek a nih thu tarlan a ni a, hemi rual hian Lawi insurance kalpuina turin hmalak mek a nih thu sawi a ni. Bana Kaih Scheme kaltlanga AH&Vety Department hnuaia hmalak tum mimal dilna 3641 a awm a. Chung zinga 2170 chu vawk vulh tum niin Ar vulh tum 908 Bawng vulh tum 269 leh Kel vulh tum 201 an ni.