Assam Regiment Raising Day Larsap hovin hmang

Larsap General (Rtd) Vijay Kumar Singh chuan nimin khan Assam Regiment Raising Day lawmna a hmanpui.

Assam Regiment din champhaphak (Raising Day) vawi 84-na pual hian nimin khan Aizawl Treasury Square-a War Memorial-ah Assam Regiment sipai huaisen, ram tana nun hlantute zahna leh hriatrengna lantir nan pangpar dah a ni a, he hunah hian Mizoram Larsap General (Rtd) Vijay Kumar Singh bakah Mizoram Ex-Services Leaque, Assam Regiment leh Assam Rifles hotute chuan zahna pangpar an dah a. Hemi hnu hian AR Ground, Aizawl-ah Assam Regiment Raising Day pualin inkawmhona neih a ni a. He hunah hian Larsap General (Rtd) Vijay Kumar Singh chuan Assam Regiment-te chu an dinchamphaphak pualin duhsakna a hlan a. Ram tana rawng an bawl tawhnate chhuanawm tiin, tha taka chhawmnung zel turin a fuih a ni.

He hunah hian MESL President leh MLA Clement Lalhmingthanga chuan hun hlu tak senga Assam Regiment-te dinchamphaphak hmanpuitu Larsap chungah lawmthu sawiin, programme changtlung tak buatsaihtu Assam Rifles-te chungah lawmthu a sawi bawk. Nimin-a hun hmanah hian Assam Rifles DIG Brig Pushpendar Sorayan, MESL Patron Lt. Col. ZS Zuala, Padma Shri Awardee Hav. Lalbiakthanga, President, World War-II Veterans Association bakah MESL Member-te, Assam Regiment leh Assam Rifles-te an tel a ni.