PWD Minister in kawng siamtute a hriattir

PWD Minister Vanlalhlana'n Aizawl Bawngkawn leh Chanmari inkar kawng siamtu Nidhi Creative Infrastructure-te kawng siam khawk lehte siam tha leh vek turin a hriattir.

Tunhnaia Aizawl khawpui kawngpui siam hna thawh chungchangah PWD Minister hian nimin khan hnathawktu (Contractor) te hi koin, PWD Official-te leh ZPM Party aiawhte nen a Pisa-ah hnathawh dan an thlirlet a, Bawngkawn leh Chanmari inkar kawng siam that hna thawh, Furpui thlen hmaa a khawk leh ta nual chu pawi a tih thu PWD Minister chuan sawiin, kawng siam hna thawktu Nidhi Creative Infrastructure-te hnenah heng kawng siam khawk lehte hi siam tha leh vek turin a hrilh a. An hmanraw hmante pawh a tha thei ang ber leh a nih dan tur ang taka uluk taka kawng siam turin a chah bawk. He kawng khawk avanga leithil pawh mipui tana him lo a nih avangin thianfai turin a hriattir a, he kawng siamthat lehna atan hian sawrkar-in sum a sen belh loh tur thu Contractor-te a hrilh bawk a ni.

PWD Minister chuan ZPM kaihhruai sawrkarah kawng siam tha leh tlo zawk an aupui nasa tih pawh sawiin, chuvang chuan an kawng siam reng reng chu a tlo a tul thu a sawi a, kawng khuar (pot hole) awmte pawh hnawh phui leh nghal turin hna thawktute a hrilh bawk.

He inkawmna hunah hian PWD Engineer-in-Chief H. Zoramliana leh a thawhpuite bakah, Nidhi Creative Infrastructure Pvt. Ltd atangin Pratik Godha, Director leh T.Choudhary Project Manager-te leh ZPM Party atangin hruaitu thenkhat te an tel a ni.