Khawvel hmundangte rualin Mizoram-ah World Environment Day hman a ni

Khawvel hmundangte rualin nimin khan Mizoram chhung hmun hrang hrangah World Environment Day hman a ni.

World Environment Day pual hian Aizawl-ah chuan Vanapa Hall-a UD&PA Department leh Mizoram Pollution Control Board tangkawp buatsaihin hun hman a ni a, he hun hi UD&PA Minister K. Sapdanga chuan hmanpuiin Environment chungchang inzirtirna chu uar lehzuala kalpui a pawimawh takzet tih a sawi a, tunlai boruaka chhiatna hrang hrang thleng leimin, tuilian leh a dangte pawh keimahni mihringte vekin bawlhhlawh sawngbawl dan kan uluk tawk loh avang leh a bik takin plastic kaihhnawih bawlhhlawhte tihralna kawnga kan inthlahdah vang a ni tih a sawi bawk.

World Environment Day 2025 pual hian Indian Council of Forestry Research & Education (ICFRE) Bamboo & Rattan Centre, Bethlehem Vengthlang-ah ‘Ending Plastic Pollution’ tih thupui hmangin hun hman a ni a, he hun hi Horticulture Minister C. Lalsawivunga chuan hmanpuiin kan nitin khawsakna ah vawi khat hman Plastic hmanna tam ta lutuk titlem tur chuan keimahni theuh atanga bul kan tan a tul thu a sawi a, kan ram leilung tichhetu, kan hriselna khawih pawi thei vawi khat hman plastic hmang tlem deuh deuh tura inzirtirna atan ‘World Environment Day’ thupui-ah ‘Ending Plastic Pollution’ hman a ni chu lawmawm a tih thu a sawi bawk.

Indian Council of Forestry Research & Education hnuaiah hian Research Centre 5 leh Institute 9-a awm a, ICFRE, Bamboo & Rattan Centre hi Rain Forest Research Centre hnuaia awm niin November 29, 2004 khan hawn a ni a. ICFRE-Bamboo & Rattan Centre, Bethlehem Vengthlang hi 11.63 Hectare a zau niin Mau species 28 leh Rattan species 11 a awm a, Kilometre 1-a thui Bamboo trail a awm bawk. Thawktu mi 15 awm mekin he Centre-ah hian Research Project 16 hlawhtling taka kalpui a lo ni tawh a, tunah hian Research 3 kalpui mek a ni.

World Environment Day hi District tinah Samagra Shiksha District Project Office te bultumin hman a ni bawk a, District Project Office Smagra Shiksha buatsaihin zirlaite leh zirtirtute nen hun hmangin thingphun pawimawhzia te sawi a nih bakah thingtiak an phun nghal bawk.