Power Line chhia siamthat mek dinhmun thlirho

Tunhnaia ruahsur nasa avanga Mizoram hmun hrang hranga kawl-phetha pekna chhia siamthat hna thawh mekte dinhmun chu nimin khan P&E Minister F. Rodingliana hovin thlirho a ni.

He hunah hian District hrang hranga Power line chhia thawmthat mekte enho niin, tun dinhmunah 33kV North Bukpui Sub-Station tih loh Sub-Station zawng zawngin power an dawng kim tawh a, North Bukpui Sub-Station pekna line pawh endik mek a nih thu tarlan a ni a. Hun reilote ah power pekchhuah theih beisei a nih thu leh khaw thenkhat power supply pekchhawnna feeder thenkhat line chhia awmte pawh a tahtawlin siamthat mek zel a nih thu an sawi. Distribution Transformer chhiate pawh thlak mek zel niin nimin khan Transformer 5 pekchhuah a ni.

Hetihlai hian Union Power Minister in P&E Minister F. Rodingliana hnena nikum August ni 5-a a lo tiam tawh angin Zuangtui leh Bukpui inkar 132 KV line load tam zawk keng thei HTLS conductor-a thlakna tur leh Mizoram chhung hmun hrang hranga Sub-Station 7 (Bawktlang, Saitual, Melriat, Khawzawl, Champhai, Serchhip Bukpui, leh East Lungdar) Transformer lian zawk dahna tur cheng vbc. 47.87 chu DoNER in an rawn pekchhuak tawh thu tarlan a ni a. He project hi zawh a nih chuan Zuangtui leh Bukpui (Serchhip) inkara 80MW chauh load la thei thin kha 200MW thleng load an la thei toh dawn a. Hei hi Saitual District, Khawzawl District, Champhai District leh Serchhip District ten an tangkaipui hle dawn a ni tih Minister chuan a sawi a ni.