Bairabi leh a chhehvel a harsatna thleng DC in a tlawh

Tunhnaia tuilian avanga Bairabi leh a chheh-vel mipui ten harsatna an tawh leh hmun him lama insaseng ngai te dinhmun enfiah turin nimin khan Kolasib Bawrhsap Robert C. Lalhmangaiha chuan Bairabi a tlawh.

Bairabi-ah hian tuilian avang hian chenna In rauhsan leh bungraw senghawi ngai engemaw zat awmin chenna In atanga insuanchhuak a hmun him lam pan-a Relief Camp-a khawsa chhungkaw 25 an awm bawk a. Niminpiah khan heng harsatna tawkte hi Bairabi SDO (Civil ) in tlawh tawhin leimin dawlna tur silpauline te sem chhuah nghal a ni. Rikrum thila inven nan North Branch YMA leh North Village Council bakah South Village Council te hnenah Sipauline a lo hlan tawh a. Tlawng lui lian hi khua a that deuh hnuah a tlahniam leh mek a, tun dinhmunah hlauh-thawnawm a awm rihlo a, report ziahlai hian Tlawng lui hi feet-5 in a tlahniam tawh bawk a ni.

Nimin-a Bairabi tlawhtu Kolasib DC hian Bairabi SDO (Civil) Conference Room-ah SDO (Civil) Chinlianmanga leh khawtlang hruaitute, YMA hruaitute leh Police aiawhte a kawm a. He hunah hian Bawrhsap chuan nikum ang tho in kumin ah Fur a thleng hmaa Bairabi pawh an tawrh an hlau hle a ni tih sawiin, an harsatna tawh dan te leh eng anga ruahmanna siam tur nge tihte chu Bairabi an tlawh chhan ber pakhat a nih thu a sawi bawk.

Kolasib Bawrhsap hian tuilian avanga harsatna tawkte dinhmun leh enkawl zel dan tur khawtlang hruaitute a sawipui zawh hian Bairabi a sawrkar hmun pawimawh; ILP Checkgate, Railway Station leh FCS Godown te a tlawh nghal bawk a ni.