MHIP in Dan hnuaiah na taka hremna pek duh

Mizo Hmeichhe Insuihkhawm Pawl (MHIP) General Headquarters chuan naupang kumtlinglo khawihchhiaa mawi lo taka a khawsak puitu Larampana chu dan hnuaiah a phu tawk hremna na tak dawng se an duh thu an tarlang.

MHIP General Headquarters chuan tunhnaia CBI ten an man, Aizawl Veng pakhata khawsa Larampana, naupang kumtlinglo khawihchhiaa mawi lo taka a khawsak pui bakah Internet hmanga a pholang chu an duh loh thu leh an dem takzet thu an tarlang a, Mizo Hmeichhiate khawihchhiatna leh mipat hmeichhiatna kawnga mualpho taka tarlanna hi thleng tawh lo se an duh thu leh Lalrampana hian dan hnuaiah a phu tawk hremna na tak dawng se an duh thu an tarlang tel bawk a ni.

CBI in a tarlan danin, May 30, 2025 khan an mi puh lakah thubuai an ziaklut a; mipat hmeichhiat lam hawia kumtling lote thlalak leh video siam, lakkhawm, kawl leh internet-a dah (upload)-a puh a ni a, Mipat hmeichhiat lam hawia kumtling lo te khawsa lai video kawlah puh a ni bawk a ni. CBI mi leh sate chuan Lalrampana chenna In chu June 4, 2025 khan dapin Electronic device hrang hrang an man sak a, Forensic endikna atangin thlalak leh video mawi lo tak tak awmna, CSAM tam tham tak hmuhchhuah bawk a ni. CBI te thil mante chu INTERPOL International Child Sexual Exploitation (ICSE) database atanga data leh Google-a Cyber Tipline Reports (CTRs)-te nen finfiah a ni a; Indian Cyber Crime Coordination Centre (I4C), Ministry of Home Affairs hnenah pawh hriattir a ni bawk.