Panchayat Advancement Index (PAI) 1.0 Report Card tlangzarhin Suarhliap VC chu mark hmu sang ber a ni

Zonuna Kawlni (LENKAWL) • June 7, 2025 • Comments • Mizoram

Rural Development and Administration Department changtu Minister Prof. Lalnilawma chuan nimin khan a Pisa-ah Panchayat Advancement Index (PAI) 1.0 Report Card a tlangzarh a, Suarhliap Village Council, Mamit District chu Mizoram-ah mark hmu sang ber an ni.

Panchayat Advancement Index (PAI) 1.0 Report Card tlangzarhna hunah hian RD&A Minister Prof. Lalnilawma chuan PAI 1.0 Report Card chu ram hmasawn dan dinhmun tarlanna darthlalang pawimawh tak a nih thu a sawi a. Ram hmasawnna atan Village Council ten Sawrkar hmalaknate theihtawpa an thlawp a tul thu a sawi bawk. Suarhliap Village Council, Mamit District-in 68.89 mark hmuin, Mizoram-ah mark hmu sang ber a ni chu a lawmpui thu Minister chuan sawiin, PAI 2.0 Report Card tha zawk neih a nih theih nan leh National Panchayat Award lawmman hial la thei turin Department leh Village Council tin ten Sawrkar hmalakna hrang hrang ngai pawimawh lehzuala, data tha leh rintlak neia report felfai a hun takah buatsaiha thehlut zel turin a chah bawk.

He hunah hian LAD Director Chuauhnuna chuan Panchayat Advancement Index chungchang a sawifiah a. Sustainable Development Goals (SDGs) tihlawhtling tura khawvel ram 193 zinga intiamna hming ziaktu zingah India pawh tel vein, SDGs goal 17 chu tualchhung mil tura herremin Localisation of Sustainable Development Goals (LSDGs) theme 9-ah siam a ni a. Panchayat Advancement Index (PAI) Report Card hi khaw tinte LSDGs tih hlawhtlinna kawnga an dinhmun leh thlen chin hriatna a ni. PAI data hi khaw tin tana hmasawnna tur ruahmanna (plan) thar siam nan leh Village Council ten National Panchayat Award an lak theihna tura kawng pawimawh tak a nih thu a sawi bawk.

PAI 1.0 ah hian Mandatory Indicator 384 leh Optional Indicator 124, a vaiin Indicator 508 hman a ni a. PAI 1.0 Report Card atana zirchian kum chu 2023-2024 niin tunah hian PAI 2.0 atan hmalak leh tan mek a ni a, a zirchian kum tur chu Financial Year 2023-2024 a ni a. PAI Report Card hi https://pai.gov.in/-ah en theih a ni bawk.