Child Marriage Free India Campaign nei mek

Rampum huapa kumtling lo inneihna tibo tura beihpui thlakna Campaign "Bal Vivah Mukt Bharat’ (Child Marriage Free India) chu Mizoram hmun hrang hrangah kalpui mek a ni.

Women and Child Development Department chuan he hmalakna hi kalpuiin hmeichhia kum 18 an tlin hma leh mipa kum 21 an tlin hma a inneih tir an nihloh nan theihtawp chhuahin mipuite hrilh hre turin District tinah hma a la mek a, Mizoram-ah chuan tihluihna ni lovin nau an pai avang te, an inruk avang te leh inngaihzawnna in a hrinchhuah thildang hrang hrang te avangin nu leh pa/chhungten an inneih tir mai thin niin Department hotute chuan an sawi a. Naupang inneih tir chu ‘The Prohibition of Child Marriage Act, 2006’ hmangin kum hnih chhung hrehawm taka lung In tantir leh cheng nuai khat thleng chawi a hremtheih an ni a, mipa puitlingin hmeichhia kum 18 hnuailam a neih hrem theih a ni tih an sawi bawk.

Women and Child Development Director Zoramthangi Chhangte chuan Naupangin a hun hma a nupui/pasal an neih hian an zirna, hriselna, eizawnna, leh ngaihtuahna te nasa takin a nghawng thin tih a sawi a, an theihna leh an thlenchin ti thuanawpin hmakhaw eng tak nei turte nun tam tak a tichhia a, hemi venpuitu tur chu nu leh pa, chhung te leh khawtlang mipui te chu an nih thu a sawi a. Dan zawm lo te chu Child Helpline Tollfree Number 1098-ah emaw, Women Helpline Tollfree Number 181-ah emaw, thuneitute hrang hrangte hnenah a thlen theih reng tih a sawi bawk.