ROW huamchhunga In sa te thiat tura hriattir an ni

National Highway-54 laihzauh leh siamthat hna kalpuia ram lak tawh chhunga In lo sa thar mi pahnih te chu an In sak te thiat tura tih an ni.
Thudawn danin Serchhip District chhunga NH-54 laihzauh leh siamthat hna thawh a nih khan kawngpui zauhna tur hian ram engemaw zat chu Dan angin lak a ni a, zangnadawmna te pek a nih hnuah kawng siam hna hi thawh zui a ni ta bawk a. Hetihlai hian heng ram lak tawh, kawngpui atana la hman si loh ah hian mi thenkhat chuan In te an lo sa leh a, heng te hi nakin zela harsatna siam thei tur te ala nih avangin hemi chungchang ah hian Dan anga hmalak a ni ta a ni.

Nimin-a In thiat tura hriattir mi pahnih te hi Chhingchhip Mualpui-a awm te niin an zinga pakhat hian zangnadawmna a lak hnuah Right of Way (ROW) huamchin ah In hi a rawn sa thar a, midang pakhat zawk hi tunhma deuh, kum 2013 chho-a Chhingchhip Mualpui-a leimin avanga NH-54 siamthat a nih tum khan a ram hi Dan anga lak sak ni tawhin helai hmun ah hian In sa turin ban a lo phun leh a. Heng te hi thla hmasa khan an In sak te hi thiat tura hriattir ni tawhin nimin thlenga an la thiah loh avangin an In sak te hi thiat turin a hmunah hian Magistrate leh Police te leh thawktu dangte an kal a. Heng mite hian chawlhkar khat chhunga thiah an tum tur thu an lo sawi avangin an In sak te hi thiah sak a ni ta rih lo a, an huntiam a ral hnuah enfiah leh tur a ni ang. Heng In sak te enfiah a nih lai hian In satute leh Village Council hruaitute pawh an tel a ni.