Apex Bank in kum kalta ah hlep vbc. 45.77 an nei

Zonuna Kawlni (LENKAWL) • June 19, 2025 • Comments • Mizoram

Mizoram Cooperative Apex Bank (MCAB) chuan kum kalta chhung khan hlep cheng vbc. 45.77 an nei.

MCAB hian June 16 leh 17 khan kum 2024-25 chhunga Bank hmalakna hrang hrangte thlirletna neiin he hunah hian MCAB Branch 31-a Manager, Senior Officer leh Board of Management te chuan Bank hmalakna hrang hrangte bakah Bank-in awlsam zawka loan a pekchhuah leh a vil theihna tur Loan Origination System (LoS) an hman tur te, Sawrkar nena hmalakna Handholding Policy leh PACS Awareness chungchang te an sawiho nghal bawk a. He huna tarlan a nih danin kum kalta chhunga Bank-in Deposit a dawn zat chu cheng vbc. 1694.21 a ni a, Loan a pekchhuah chu cheng vbc. 1217.64 niin kum kalta chhunga a hlep zawng zawng chu cheng vbc. 45.77 lai a ni.

Apex Bank hian nimin khan Board Meeting neih nghalin Bank Policy hrang hrang te ennawnin a pawm nghal a. Board Meeting chuan khawpui chhunga mipui ten Bank kal kher lo leh sum nitin an khawl theihna tura pawisa khawntu tur, Pigmy Collector pali (4) a la nghal a. Bank a than zel avangin Bank thawktu post 56 (Officer 14, Clerk 28 leh Subordinate 14) siam belh pawh a remti nghal bawk a ni.