MRI khawl leh khawl dangte hman theih turin hawng

Aizawl Smart City Limited, Urban Development & Poverty Alleviation (UD&PA) Department hmalakna in Aizawl Civil Hospital-a MRI khawl mipuite tana tlangzarhna leh bungraw dangte hlanna hun chu nimin khan hman a ni.

Aizawl Civil Hospital Conference Hall-a he hun hman ah hian Aizawl Smart City Limited-a CEO C.C. Lalchhuangkima chuan tuna an tlangzarh tak MRI khawl hi German Company, Siemens Healthineers kutchhuak niin cheng nuai 872 man a ni tih a sawi a; Siemens Company nen hian a chhiat pawha enkawl zui zelna turin thawhdunna thuthlung kum sawm (10) chhung atan an ziak tih a sawi bawk. Smart City hmalakna hian MRI khawl bakah hian khawl dang chi hrang hrang sawmhnih pali (24) chu Aizawl Civil Hospital tan hian lei a ni bawk a. Dr. Lalchhuankimi, Senior Medical Superintendent hnen atangin heng khawl hnathawh dan leh tangkainate ngaihthlak a ni bawk a; khawl chi hrang hrang ziangah hian Cancer leh natna chi hrang hrang awlsam zawka hmuhchhuah theihna te, zunthlum leh accident avanga Mitdel tur mai tur zai dam theihna te pawh a tel a ni.

Aizawl Smart City hmalakna hian tunhnaiah sawrkar leh Private Hospital hrang hrangte tan Ambulance pariat (8) lei a lo ni tawh bawk a; Tuirial-ah Common Bio-medical Waste Treatment Plant cheng nuai 801.15 sengin din a lo ni tawh bawkin, April 2025 atang khan hman tan a ni tawh a ni.

Nimin-a he hun hman hi UD&PA Department changtu Minister K. Sapdanga chuan khuallian nia hmanpuiin Civil Hospital-in MRI khawl an nei tur chu thlamuanthlak a tih thu leh mipuite tan a nih thu a sawi a. Mizo Doctor thiam tak takte pawhin hmanrua kan neih that tawk loh avanga an thiamna leh theihna te a nih tur anga an hman chhuah theih loh fo thinnate pawhin ziaawm lam a pan chhoh zel a beisei thu a sawi bawk a. Doctorte hlutzia leh an tawngkam khat lek pawhin damlote a thlamuan theihzia sawiin, midangte thlamuantu ni fo turin a chah a, MRI khawl leh khawl dangte pawh mipui rawngbawlna atan tangkai taka hmang zui zel turin duhsakna a hlan bawk.

He hunah hian Health Minister Lalrinpuii pawhin Aizawl Smart City hmalakna fakawm a tih thu sawiin, Department hrang hrangte inkara thawhhona tha a awm chu lawmawm a tih thu a sawi a. Sawrkar hmalakna tarlangin, PHC leh CHC thawmthat a nih thu te, MUHCS hnuaia damlote tan ICU indaihlohna awm thin tihziaawm a nih theih nan ZMC-ah ICU 13 siam belh a nih dawn thu te, Siaha, Lunglei leh Champhai-ah pawh ICU 5 theuh siam a nih tur thute a sawi a; hun reilote ah Kal thlak (Kidney Transplant) pawh tih theih a nih dawn thu a sawi bawk.