Mizoram District tinah Nasha Mukt Bharat Abhiyaan

Mizoram-a District hrang hrang 11-ah ‘Nasha Mukt Bharat Abhiyaan (Drug Free India Campaign)’ chu kalpui mek a ni.

Ministry of Social Justice & Empowerment, Govt. of India leh AIIMS, New Delhi tangkawp chuan kum 2019 khan India ram puma ruihhlo hmansual dan zirchianna ‘Magnitude of substance use in India 2019’ a nei a, chuta a landan chuan Mizoram chu India ram pumah Opiods kaihhnawih (Heroin etc.) hmansual ah kan sang ber a ni. National Survey an neihna atangin Sawrkar Laipui Ministry of Social Justice & Empowerment chuan ruihhlo hmansual hluarna bik District 272 chu thlangchhuakin ruihhlo chungchanga inzirtirna nasa lehzual zawk a hmalakna atan ‘Nasha Mukt Bharat Abhiyaan (Drug Free India Campaign) kalpui hi a rel ta a ni.

He hmalakna hnuaiah hian Phase I-ah Mizoram District pathum thlan niin Aizawl, Champhai leh Kolasib-ah niin heng District-ah hian chak takin hmalakna kalpui a ni a. Phase II-ah District 100 tihbelh lehin heng te nen hian Nasha Mukt Bharat Abhiyaan hi District 372-ah kalpui mek a ni a, Mizoram-ah pawh District zawng zawng (11 te) a rawn huam ta a. District tinah hian Deputy Commissioner te chu he Campaign-ah hian Chairman an ni.

Aizawl District-a Nasha Mukt Bharat Abhiyaan (Drug Free India Campaign) hmalakna hnuaiah hian nimin khan MHIP General Hqrs. nen tangkawpin MHIP Thuampui Branch Member te tan Ruihhlo chung-chang inzirtirna leh a thlawnna inentirna buatsaih a ni a, he hun hi Health Minister Lalrinpuii leh Aizawl DC leh Chairman Nasha Mukt Bharat Abhiyaan Aizawl District Er. Lalhriatpuia IAS ten an hmanpui a ni.