MPCC Adviser in Hrangturzo Bial a tlawh

Mizoram Pradesh Congress Committee (MP-CC) Adviser Zodintluanga chuan Hrangturzo Bial a khaw-a khaw thenkhat te nimin khan tlawhin Party mite nen an inkawm a ni.
MPCC Adviser hian nimin khan Keitum, Khawlailung, North Vanlai-phai leh Cherhlun khua te tlawhin, “ZPM sawrkar hian kum hnihna an hmang mek a, an thiltih leh an rorel dan hi Mizoram mipuiin an thlir a, an hmu chho mek a. ‘Kan ti ang’ an tih an tih leh si loh te, ‘kan ti ve lo ang’ an tih zawng zawng an tih te hi Mizoram mipui hi a hretu an ni a. Heng zawng zawng hmang hian kum 2028 MLA inthlanah mipuite'n an chungah Vote hmangin ro an rel ve thung tawh dawn a ni,” a ti.

Kum 10 Congress an sawrkar chhungin Mizoram tana ram leh hnam rotling sulhnu an ngah thu pawh Zodintluanga chuan sawiin, “Sawrkar sawisel bo erawh kan ni lo, sawisel bo hi he khawvel ah hian awm pawh a awm thei lo tih hretu vek kan ni,” a ti a. “NLUP kan sem ang kan ti a, Mizo-ram pum kan tuam chhuak a, Vawiin ni thlengin rahbi tleu laklawh tawh NLUP hmanga eizawnna ngelnghet nei mi tam tak Mizoram chhungah an awm a ni. Congress sawrkar hunlai vekin India hmarchhak State dangte pawhin tihngaihna vak an hriat loh khelmual tha, phullem phah Aizawl sipai Lammual-ah kan din a, District thenkhatah te pawh kan din zui a ni,” a ti bawk a. Sawrkar hnathawkte dikna leh an zahawmna vawnhim sak kawngah Congress sawrkar khan theihtawp an chhuah tih pawh sawiin, “Vawiin thlenga sawrkar hnathawk, a lian a te te'n min hrilh fo chu 'In hunlai khan kan lo zalenin, thawhpui in lo nuam ber a ni' tih a ni,” a ti bawk.