MNF Policy & Programme Board thutkhawm neih a ni

MNF Policy & Programme Board chu a tum thumna atan nimin khan thukhawmin thalaite hna thawh tur siamsak leh hnathawk thei tura thiamna neia thalaite chherchhuah dan tur chu an sawiho zinga langsar ber a ni.

MNF Policy & Programme Board hi nimin khan Aizawl-a Mizo Hnam Run, President’s Chamber-ah thukhawmin he hun hi Board Chairman leh MNF Sr. Vice President Dr. R. Lalthangliana chuan a kaihruai a, sawrkarna siam leh tura inbuatsaihna ngawrh taka an kalpui chhoh mekah Zoram mipuite tana innghahna tlak Policy leh Programme, a taka kalpui theih tur duanchhuah a tul tih sawiin, he huna tel Board Member te chu uluk taka ngaihtuahna seng turin a chah a ni.

Thiamna bik leh tawnhriat chi hrang hrang neite telna MNF Policy & Programme Board thutkhawm ah hian mipui nawlpuite an damloh nikhuaa an inenkawlna, Mizoram Health Case Scheme mumal zawka duan dan tur huam zau takin an sawiho a. Tuna ZPM sawrkarin Mizoram Universal Health Care Scheme (MUHCS) a kalpui mekah ruahmanna fel lo tam tak a awm avanga miretheite tawrhna thleng mek chungchang te, Sawrkar in Private Hospital te inbiak remna a neihpui hmasak loh avanga damlo ten an tawrh mek dan leh Sawrkar Damdawi In-a khum chang si lo, Private Hospital ban phak bawk si lo, manganna tawk mek damlo tam tak an awm thu te an sawilang a ni.

MNF Policy & Programme Board thu-khawm hian thildang bakah Mizo thalaite tana hnathawh tur tam zawk siam belh leh hna thawk thei tura thiamna neia thalaite chherchhuah chung-chang chu an sawiho zingah a langsar hle tih MNF thuchhuah chuan an tarlang a. Hemi kawngah hian policy tha leh rintlak duangchhuak ngei turin fimkhur tak leh uluk taka zirchianna kalpui nise an ti.