Bana Kaih policy hnuaiah MIZOFED-a Primary Society te dinchhuah tir dan tur ngaihtuah tha ti

Cooperation Department changtu Minister PC. Vanlalruata'n Mizoram Sawrkar tharin a ngaih pawimawh em em Bana Kaih policy hnuaiah MIZOFED hnuaia Primary Society 350 dawnte din chhuahtir dan tur ngaihtuah tha a tih thu a sawi.

Nimin khan Aizawl-a Synod Conference Hall-a MIZOFED Annual General Assembly vawi 27-na neih niin he hun a hmanpuina ah Cooperation Minister PC. Vanlalruata chuan, Sawrkarin Cooperative Movement a ngaihpawimawh chhan chu mipuiten an thawhhona atanga thawhchhuah an neih te leh chumi avanga hmasawnna tlo leh tluantling, Sustainable Development hrang hrangah ramin a hlawkpui thin vang a ni tih a sawi a. UNO-in kumin hi ‘Year of International Cooperative’ ah a puan angin Cooperative hmangin Mizoram-ah pawh Mizoram tha zawk siam an tum thu a sawi bawk a. Mizoram Sawrkar tharin a ngaih pawimawh em em chu Bana kaih policy a ni tih sawiin, chumi hnuaiah chuan Bana kaih ngaite Bana kaih an tum tih a sawi a, MIZOFED hnuaia Primary Society 350 dawnte chu Bana kaih an ngai em tih ngaihtuah a, engtin nge an din chhuahtir ang tih chu ngaihtuahho turin a chah a ni.

Cooperation Minister chuan, Sawrkarin thlai thar a leite kaltlangin Society-te nena thawhho dan an ruahman a, kumin ah enchhinin, a kum thumna ah chuan Society tha tak tak khaw tam takah a pian theih an beisei tih a sawi a, chu chuan Mizoram-ah hmasawnna thar a pek ngei an ring tih sawiin, Mizote chu Kohhran-ah thawkho thiam tak ni mah se, Society angin an thawkho thiam tawk lo nia a ngaih thu a sawi a, thangthar zawkte, lehkhathiam zawk te, Society-ah Cooperative Movement-a an hnuhluh chhoh zel chuan kalphung fel tak hnuaiah thawhhona tha tak awmin, Mizoram-ah Cooperative Movement-in hma a sawn ngei a beisei thu a sawi a ni.

Tun dinhmunah MIZOFED hian Mizoram hmun hrang hrangah Petrol Pump 10 neiin, Tanker 46-in an chawm a, kum 2024-25 chhung khan tuialhthei an hralhna atangin Rs. 7,56,58,779/- an hlep a, Mizoram-a District 6-ah LPG Distributor neiin, sawrkar kum liamta ah khan Rs. 3,24,35,989/- an hlep bawk.