Mizorama YouTubers-te pualin I&PR in buatsaih

Mizoram-a YouTubers-te pualin Social Media-a thuthar thehdarh leh an thil chhuah chungchanga fimkhurna tur leh a kaihhnawih awm theite zirhona, ‘Media Sensitization for YouTubers’ chu nimin khan neih a ni.

Directorate of Information & Public Relations buatsaiha Lianchhiari Run, I&PR Conference Hall-a he hun buatsaih ah hian Prof. Irene Lalruatkimi, HOD, Department of Mass Communication, Mizoram University chu Resource Person-ah hman niin Social Media pawimawhzia a lem nena entirin tunlai khawvela YouTuber-te pawimawhzia a sawi a. YouTuber-te chu khawtlang siamtha thei tu, hnam nunzia leh Mizo tawng humhalhtu an nih theih bakah sawrkar khalh ngiltu an nih theih dan te a sawi a; thuthar thehdarhtute pawimawhzia sawiin, Democracy inrelbawlna banpui pawimawh tak tak zinga mi, ‘4th Pillar’ ti hiala hriat an nih thu leh thuthar thehdarh leh thil post chungchanga fimkhurna tur thil pawimawh hriattur chi hrang hrangte a sawi bawk a ni.

Mizo YouTubers Association hi kum 2022-a din niin Member 60 chuang an awm mek a. Nimin-a hun hman ah hian Mizo YouTubers Association member bakah I&PR Officer leh Staff te an tel a ni.