Lunglei District-a JJM Scheme zawhfel a ni tawh

Lunglei District-a Jal Jeevan Mission (JJM) hnuaia Water Supply Scheme chu thawh zawh vek ni tawhin Swachh Bharat Mission-Grameen (SBM-G) hnuaiah pawh hmalakna nasa taka kalpui a ni.

Nimin khan Lunglei District Water & Sanitation Mission (DWSM) chu an Chairman leh District Bawrhsap Navneet Mann-i hovin Lunglei DC Conference Hall-ah thukhawmin Jal Jeevan Mission (JJM) leh Swachh Bharat Mission-Grameen (SBM-G) hnuaia hmalakna kal mek leh hmachhawpte an thlirho a. He huna tarlan a nih danin JJM hnuaiah Lunglei District-ah Water Supply Scheme 150 awmin thawh zawh vek tawh a ni a. JJM hnuaia Lunglei District-a thingtlang khaw 101 awmah In tinah Tui Connection pek vek tawh niin, Har Ghar Jal (HGJ) Village an ni vek tawh a. Lunglei District chhunga School 359-ah leh Anganwadi Centre (AWC) 238-ah JJM kaltlangin Tui herhhaw mai theihna, Tap Water Connection pek tawh niin, UDISE+ leh Poshan Tracker portal-ah te connection pek zat data dik hi tarlang turin hmalak nise an ti bawk.

Lunglei Ramzotlang-a Tui thianghlim dan endikna hmun, Lunglei District Laboratory chu January ni 14, 2025 khan India rama thuneitu sang, NABL (National Accreditation Board for Testing and Calibration Laboratories)-in a rintlak tih a pawmpuina (accreditation) hmuh a nih thu he hunah hian tarlan a ni a. Khaw hrang hranga tui lakte a thianghlim leh thianghlim loh kumtin tum 2/3 endik thin a nih thu tarlan niin, nikum lama Lunglei District-a khaw pariatin natna hrik leh damdawi hlauhawm chungchanga an khaw tuilak an endiktir chu bawlhhlawhna leh hlauhawm a awm lo tih finfiah a nih thu tarlan a ni a. Lunglei District-a HGJ khaw tinah anmahnia tui thianghlim dan an lo endik theihna tur, Field Test Kit (FTK) pek a nih tawh thu leh khaw tinah FTK hman dan thiam hmeichhia (FTK Trained Woman) an awm vek thu tarlan a ni bawk.

Swachh Bharat Mission-Grameen (SBM-G) hnuaiah Lunglei District-ah bawlhhlawh dah tawihna khur (compost pit) 392, Tuichhe paihna khur (soak pit) 450 leh vantlang inthiarna In (Community sanitary complex) 21 siam/sak zawh a nih tawh thu tarlan a ni a. Lunglei District chu September 2018 khan inthiarna mumal nei lo awm tawh lohna (Open Defecation Free-ODF) District-a puan a nih tawh thu leh Lunglei District-a khaw 99 chu inthiarna tha bakah bawlhhlawh thehthang dan felfai tak kalpuina, ODF Plus khuaah puan a nih leh tawh thu tarlan a ni a. SBM-G hnuaiah hian kum 2024-2025 chhungin mimal inthiarna In (Individual Household Latrine-IHHL) 300 sak zawh a nih thu leh kum 2025-2026 chhungin IHHL 200 sa leh tura ruahman a nih thu tar lan a ni bawk a. Lungsen RD Block chu Block dawmkan ngai bik, Aspirational Block a nih angin kumina hmalakna tur atan hian ngaih pawimawh hmasak tum nise an ti bawk.