Mizoram hmun hrang hrangah urhsun takin YMA Day vawi 90-na hman a ni

Nimin June 15, 2025 kha Mizoram-a tlawmngai pawl lian ber YMA dinchamphaphak a ni a, YMA Day vawi 90-na hi Pathianni a nih avangin Inrinni leh Zirtawpni khan Branch tam tak chuan an hmang tawh a, Vawiin lama hman tum pawh an la awm bawk.

Kumin-a YMA Day (June ni 15) hi Pathianni anih avangin Central YMA chuan Branch hrang hrangte chu June ni 14 emaw, Thawhtanni June ni 16 emaw-ah YMA Day hmang turin a hriattir a, Branch tam zawk chuan Inrinni khan hmangin Zingkar atangin Branch hrang hrangin mahni vengchhung tifaiin an hnatlang a, Serchhip-a YMA Brancha tam ber te pawhin zingkar-ah hnatlang neiin chhun lamah nileng-a hun hmang te an awm bawk a, kumdang anga awmni kham-a hun hmang erawh kumin hian an tam lutuk lo niin a lang.

YMA Day vawi 90-na puala thuchah a siamah Central YMA President Lalhmachhuana chuan, “Young Mizo Association (YMA) hi NGO a ni mai lo a, hnam innghahna lungphum, Mizote min phuarkhawmtu leh a tul anga ram leh hnam tana ke pen thin a ni,” a ti a. YMA chuan a din tirh, kum 1935 atanga Vawiin thlengin Zofate tan thil tha tam tak a ti tawh tih sawiin, kumin YMA Day pualin Home, damdawi In leh Mizoram pawna Mizo Welfare tan an luangchhuak tih a sawi a. YMA chungchang sawiin, “YMA hi thleibik nei lo pawl, a tê ber atanga a lian ber thlenga min hrut-rualtu pawl a ni a. Rikrum leh chhiat tawh thilah YMA hi auh hmasak ber a ni thin a. Sual do tur pawhin YMA-in ke a pen thin a, mipuite thlamuantu pawl a ni,” a ti a. YMA chuan ramngaw leh nungcha humhalh kawngah te, faina leh ruihhlo do kawnga a hmalakna avangin hriat a hlawh tawh hle tih sawiin, lawmawm a tih thu a sawi a. YMA Day denchhen hian thisen pek, ei leh bara luanchhuah leh mi dangte tana thil tha tihna nia hmang turin Member te a chah bawk. 

Central YMA President chuan YMA in hma a la sawn zel tih sawiin, YMA member pawn nuai 5 an tling tawh tih a sawi a, Group YMA 50, Sub-Headquarters 8 leh Branch 821 a awm ta chu a bul tantute, YMA hruaitute leh member, Veng tin leh khaw tina tanlatute avang a ni, a ti a. YMA dinna leh innghahna, ‘Tanpui ngaite tanpui’ kawngah ke an pen zel tih sawiin, tunlai thangthar zingah YMA hlutna hrefiah zo lo awm palh theih avangin a tul ang zel a inhrilhfiah a pawimawh tih a sawi bawk.