Dungtlang khuaa ruhro hmuh kum 285 a upa niin hria

Dungtlang khaw bula ‘Tianghrang thlan’ atanga ruhro laihchhuah chu Art & Culture Department chuan PETA Laboratory, Florida, USA-a carbon-14 dating hmanga enfiah a nih hnuah kum 285 vela upa a ni tih a nemnghet.

He ruhro hmuhchhuah a nih thu leh carbon-14 dating hmanga a upat zawng finfiah tura buaipui a nih thu hi Art & Culture Minister C. Lalsawivunga chuan Mizoram Assembly Session-ah a lo sawi tawh a. “PETA Laboratory, Florida-ah carbon-14 dating hmanga enfiah tura kan thawn chu result a lo let tawh, kum 285 vela upa nia finfiah a ni a, Mizoram-a ruhro laihchhuah thiamna sang hmanga finfiah tawh zingah chuan a upa ber a ni,” tiin Vanlalhuma Singson, Art & Culture Department-a Archaeologist chuan a sawi. 

He ruhro haichhuah hi April, 2024 vel atang khan Vanlalhuma Singson leh Dr. Lalhminghlua, Asst. Proff. Hatim, Lunglei te chuan zirchiangin an theih ang angin thiamna sang zawk hmanga a chin chiang zawk hriat tumin an bei a. “Tianghrang thlan nia ngaih, Dungtlang khaw daiah hmuh a ni tih hi kum 2020 khan report kan dawng tawh a, a velte pawh kan enfiah a; mahse, han haichhuah mai chu a hun kan la ti loa, a chhehvelte buatsaihin hetiang Archeological Site kan neihte hi dimdawi takin kan zir hmasa thin a ni,” tiin Vanlalhuma Singson chuan a sawi.

Uluk taka a hmunhma buatsaihin a thlan tichhe lo thei ang ber leh a nihna dik tak anga remkhawm leh theih tura a hmunhma an ruahman fel diam hnuah April 2024 khan Art & Culture Department hmalaknain Vanlalhuma Singson leh Dr. Lalhminghlua te hian an hai ta a. Ruhro them engemawzat hmuhchhuah a ni a, a thente chu a upat deuh tawh avangin a lo riral tawh niin an sawi a. “An zalh dan atanga a landanin he mi ruang hi mi pawimawh engemaw tak a nih a rinawm a, lung te deuh zawkte'n hual a ni a, zah taka an vui mi pawimawh engemaw tak niin a lang,” an ti.

A&C Archeologist Vanlalhuma chuan hetianga Mizo thlan hlui atanga ruhro lakchhuah, a kum nen lam finfiah a ni ta hi Mizoram history chipchiar leh chiang zawka kan hriat theihna tur kawnga mellung pawimawh tak a ni tih a sawi a. Mizorm-ah hian Puk ruhro hmuhchhuahna hmun engemawzatah hmuh a ni tawh a, chung zinga langsar zual deuhte chu Pukzing khaw kianga Pukzing puk, Mamte khaw kianga Mi Lu puk, Farkawn khaw bula Lamsial Puk leh Vaphai khaw bula Kungawrhi puk te a langsar zual deuhte an ni a. Vanlalhuma chuan a thawhpui Dr. Lalhminghlua nena hmun tam tak an zirchianna atanga a lan danin Mizote an thlangtlak tirh hunlai vel hian mi zawng zawng an inphum ngai lo nia ngaihdan an nei lian hle a. Chutihrualin ruhro vawnthat erawh a ching niin a lang bawk.