YMA chu tanpui ngaite tanpuitu, Zofate tana pawl tangkai leh zahawm a la ni reng tih sawi
Chief Minister Lalduhoma hian Inrinni khan a Bial chhung Neihloh khuaah YMA Day vawi 90-na lawmna hun hmanpuiin Chief Minister chuan khawvel hmun hrang hranga awm YMA member zawng zawngte YMA Day chibai a buk a. YMA chu a din tirh phat atangin tanpui ngaite tanpuitu, Zofate tana pawl tangkai leh zahawm a la ni reng tih sawiin, “A hlutna hi a hniam thei lo. Mi thenkhatten YMA ropuizia hi an la hmu fiah lo a nih chuan lungngaihna leh harsatna an tawh ni-ah an la hmu ngei ang. An fel vang emaw, an that vang emaw ni lovin Zofa an nihna vang ringawtin YMA hian a la tuamhlawm dawn a. An damlai-a a tuamhlawm ta lo a nih pawhin an ruang tal chu zah takin thlanmual-ah a phum ngei ang,” a ti bawk a. Tunhnaiah ruahpui vangin chhiatna kan tuar nasa tih pawh sawiin, “Chhiatna thlenna apianga tanpuitu langsar ber chu YMA te an ni. An tanpuina dawngtu, a bikin hnamdang ten nasa takin an lawmna thu Social Media lamah an rawn phochhuak a. Mizo min tihmingtha em em a ni,” a ti bawk.
Chief Minister chuan kan ram leh hnam din chhuahna tur chu thawhchhuah tam tak nei ram kan nih a, hnamdangte mamawh pe thei khawpa kan san hun a nih thu pawh sawiin, “Chu dinhmun thleng tur chuan YMA member ten hmathlir fel tak neia hna kan thawh a ngai. Kan ram siamtha tur hian hnamdangte an rawn kal dawn lova, kan tu leh fate rawn tih atana dah chi pawh a ni lo. Keini, tuna chhuan awm mek te hian thlentir i tum ang u,” a ti.
Bialtu MLA ni bawk Lalduhoma chuan Neihloh chu khaw lian a ni lo tih sawiin, “Mahse a chhunga cheng mipuite in inngeih avangin a nuam hle. A hmunhma hian duh thu a sam lova, a him tawk lova, a zauh hleih theih tawh bawk si lova. In khaw ramchhungah hian khaw thar kai mai ula a thain ka ring. Sawrkar nena tangruala ngaihtuahna thar sen mai thain ka hria,” tiin an khua sawn mai thaa a hriat thu a sawi bawk a. Thenzawl leh a chhehvel ram thuta Peace City din tuma hma a lak dan pawh tarlangin, “Master Plan kan siam thuai dawn a, a tak a chan hunah chuan in khawtlang hian in chhawr hle dawn a ni,” a ti bawk.
Neihloh Branch in YMA Day an lawmna hun hi an President Lalbuatsaiha chuan kaihruaiin Adviser C. Lalhmingliana leh Neihloh VCP Lalawmpuia te pawhin thu an sawi a. An Branch-ah hian YMA Member 262 awm mekin an member boral mi pahnih te sunna hun hman a ni bawk.
Tunhnai ruahsur nasa vang khan Neihloh khua hian chhiatna a tuar nasa hle a, an khaw panna kawng rei tak pingin, chenna Tn engemaw zat a chhia a, an khaw tuilakna chhiain Tanky awmna a him lova. YMA Hall leh Library pawh leiminin a hnawh avangin YMA Day pawh hi Primary School-ah an hmang a ni.