Minister in Camping tlawh

Synod Revival Camping Centre (SRCC), Sihphir Neihbawih-a ruihhlo ngai te puala Chhanchhuahna Camping neih mek chu nimin khan Excise & Narcotics Department changtu Minister Lalnghinglova Hmar chuan a tlawh.

Nimin a Chhanchhuahna Camping neih mek a tlawhna ah hian Excise Minister chuan ruihhlo ngaite puala Camping buatsaihtute hmalakna fakawm a tih thu sawiin, “Ruihhlo do kawngah sawrkar leh khawtlang in theihtawp a chhuah chungin Kohhran a tel chuan lian zawk leh awmze nei zawkin hma a lak theih thin a ni,” a ti a. Tuna camping boruak atangin ruihhlo ngai chhanchhuah kan mamawh zia a lang chiang hle tih sawiin, Kohhran pawhin thildang thlauhthla chuang lovin helam hawi telh telh se a duh thu a sawi bawk.

Minister hi Synod Revival Committee Director Rev. JC Lalramliana, Synod Revival Committee Member Rev. F. Lalrinnunga leh Camp Director Upa Lalmuana ten an lo dawngsawng a, Camper te chu an chhuahna tur zawnsak vek tum a nih thu leh, an chhuah hnuah pawh In lama tlawhchhuah vek tum a nih thu an sawi a. Karleh Thawhlehni atangin Follow up Camping neih tum a nih thu an sawi bawk.

Chhanchhuahna Camping neih mek hi May 5, 2025 khan neih tan niin Vawiin, June 5, 2025 hian an chhuak dawn a, he Camping-ah hian Camper tam laiin mi 1005 an tling a, Synod Revival Camping Centre-ah hian tun dinhmunah mi 120 awm mekin, Campers te hi kum 18 leh 67 inkar te an ni.

Synod Revival Camping Centre (SRCC) bakah hian Youth Recreation Centre, Falkland-ah Chhanchhuahna Camping hi kalpui niin mi 112 an awm mek bawk a. Camping buatsaih nan hian cheng nuai 40 vel sen tawh a ni. Nimin a helai hmun a tlawhna ah hian Minister hi Commissioner, Excise & Narcotics Department Z. Lal-hmangaiha chuan a tawiawm a ni.