May thla ah nikum aiin kumin ah ruahtui a tam

Kumin 2025 May thla chhungin Mizoram-ah ruahtui mm 620 zet a tla nia chhinchhiah niin nikum May thla aiin a tam zawk nia chhinchhiah a ni.

State Meteorological Centre-a an chhinchhiah danin, kumin hian May thlaah ruahtui mm 620 a tla a, nikum May thla khan ruah a sur nasa in mm 519 a tla a, amaherawh chu nikum-a ruahtui tla ai hian kumin hian nasa takin ruahtui tla hi a tam a ni. Amaherawhchu, kumin May thla a ruahui tla hi thla tluan a tam leh ruah sur reng a ni lo thung a, May ni 29, ni 30 leh ni 31-ah te ruahtui tamin June ni 1-ah a tam bawk a, May ni 29 hma lama ruahtui tla erawh tih tham a awm lo thung a. Nikum khan May thla ah thlitleh (Cyclone Remal) avangin chhiatna thleng tam mah se kumin hian thli avanga harsatna thleng a awm lo thung niin a lang.

Chhinchhiahna atanga a lan danin kumin ah ruahtui a tla har a, ruah hmasa ber pawh March ni 18-ah a sur chauh a, chu pawh mm 1.8 chauh a ni a, teh tham ngawr ngawr a ni. Hemi hnu March thla chhungin a sur zui miah lo bawk. May thla chawhnu lam atangin ruah hi sawi tham a sur ta chauh a, kumin a ruahtui tam ber chu May thla chawhnu lama mi a ni tiin a sawi theih ang. State Meteorological Centre-in an chhinchhiah danin, kuminah January ni 1 atanga May ni 31 thleng khan ruahtui mm 750.4 a tla a, chung zinga mm 620 chu May thla chhunga mi a ni.