Mahni mawh-a lak pawimawh ti

Land Revenue & Settlement Minister B. Lalchhanzova’n ruihhlo-in a tihbuai chhungkua ten midang puh mai lova enkawl chu mahni mawh a lak theuh a pawimawh tih a sawi.

Mizoram State AIDS Control Society (MSACS) leh Association for Voluntary Blood Donation (AVBD) buatsaiha khawvel huapa a thlawna thisen pe thin te Ni, World Blood Donor Day puala nimin-a Dawrpui Multipurpose Centre, Aizawl-a hun buatsaih a hmanpuinaah Minister chuan ruihhloin a tihbuai fa nei, nu leh pa, an fate Home a dah kher lo a, mahni-a manganpuia, mualpho pui ngam, khawiah emaw an harsatna ben per zel tum lo ramin a mamawh tawh tih a sawi a, thalaite chu ruihhlo avanga nunna chan lo a, rei tak dam tura an taksa vawng tha turin a chah a ni. Minister chuan, a thlawna thisen pe thin te chu an thil tih a lar lo-a a lan pawhin ram pumin a hria a, Pathian in a hriatpui tih a sawi a, a thlawna thisen pek chu a dawngtute tan pawh thil lawmawm tak a nih thu a sawi bawk.

Kumin-a World Blood Donor Day-ah hian thupuiah 'Thisen pe la, beiseina siam rawh, tangrualin nunna kan chhan thei' (Give Blood, give hope: together we save lives) tih hman a ni a. MSACS tarlan danin nikum sawrkar kum chhung khan Mizoram-ah thisen Unit 34,752 pek niin heta tanga zaa 93.71, Unit 32,566 chu a thlawna pek a ni a. Kumin sawrkar kum kal mekah April atanga May thla chhung khan thisen Unit 5,713 pek tawh niin heta zaa 90.11, Unit 5,148 chu a thlawna pek a ni a. Blood Donation Camp 90 buatsaih a ni tawh bawk a ni. 

Nimin-a World Blood Donor Day puala hun hmanah hian thisen pe tha te lawmman hlan niin Zirlaite kalkhawmin thisen pe turin thu an tiam bawk a. NSS chuan thisen pe tam ber chawi-mawina dawngin Unit 6118 an pe a, Central KTP in Unit 5457 leh MTKP in Unit 2569 an pe bawk.