Lungsen RD Block-a nu leh naupangte hriselna leh chawikanna tur, Project BLOOM hawn a ni

Lunglei District Deputy Commissioner (Bawrhsap) hmalaknaa Lungsen Aspirational Block huamchhunga nu leh naupangte hriselna leh chawikanna kawnga beihpui thlakna tur, Project BLOOM kalpui tur chu nimin khan Lungsen Primary Health Centre (PHC)-ah District Bawrhsap Navneet Mann-i chuan a hawng.

Project BLOOM (Beter Living through Outreach, Optimal Maternal & Child Health) hawnna hunah hian Lunglei Bawrhsap chuan Project BLOOM chu a hminga programme ruahman satliah mai ni lovin, nu, naupang leh chhungkaw tin hriselna leh chawikanna tura thutiam a ni, a ti a. Lungsen Aspirational Block huamchhunga nu leh naupang hriselna kawnga harsatna hrang hrang awmte chu Project BLOOM kaltlanga chinfel theih a nih a beisei thu sawiin, Project hlawhtlin nan Department hrang hrang leh khawtlang hruaitute leh mipuite nen thawhhona tha tak neih a pawimawh thu a sawi a. Block hnufual nihna atanga chhuak a, kawng tinrenga hmasawn turin sawrkar Department hrang hrang kaltlanga hmalakna awmte chu theihtawp chhuaha tawiawm turin Lungsen Block mipuite chu a sawm a ni.

He hun hi Lungsen Block Development Officer (BDO) Lalhruailiana Zote chuan kaihruaiin Lungsen PHC-a Medical Officer Dr. Lalremruati leh Lungsen Child Development Project Officer (CDPO) Vanlalsanga te chuan Project BLOOM kalpui dan tur leh mipuite tana hriattur pawimawh hrang hrang an sawi a. Nau nei turte lo awm lailawkna leh hahchawlhna atana khualbuk, 'Maternity Waiting Room' ruahmantu chhungkaw panga (5) te hnenah lawmthu sawina thilpek hlanin Raipuar 5 te hnenah nau an neih huna an hman tangkai tur 'BLOOM Gift Basket' pek a ni bawk a. Raipuarte a hun taka chhinchhiah (register) an nih a, chaw tha (supplementary nutrition) pawh tha taka an dawn theih nan leh damdawi In-ah ngei nau an neih theih nan te, nausen leh naupangte'n an thanlenna atana mamawh khawp chaw tha an hmuh a, an lo hrisel zel theih nan leh nu leh naupangte tana sawrkar ruahmanna hrang hrang awmte a chhawr turte'n an hriata an chhawr ngei theih nan te Project BLOOM kaltlang hian hmalak a ni ang.

Project BLOOM hawnnaah hian Lungsen PHC huamchhunga raipuar, Lungsen PHC-a nau nei turte hruaina tura NHIDCL-in CSR (Corporate Social Responsibility) hmanga an pek lirthei, 'Safe Womb Wheel' tia a hming vuah chu a taka hman tan turin vailiam a ni bawk.