Larsap leh Governor in tawrhpui thu an sawi

Mizoram Larsap General (Rtd.) Vijay Kumar Singh leh Chief Minister Lalduhoma te chuan ruahsur vanga Mizoram hmun hrang hranga chhiat tawkte an tawrhpui thu an sawi a, mipuite chu fimkhur lehzual turin an chah bawk.

Governor hian Social Media kaltlanga thuchhuah siamin, tunhnai ruahsur nasa avanga Mizoram hmun hrang hranga chhiatna thleng leh hemi avanga nunna hial chan an awm chu pawi a ti takzet tih a sawi a. Khawhar chhungte leh In leh lo chante thinlung takin a tawrhpui a. Hliam tuarte pawhin damna an chan leh thuai theih nan duhsakna a hlan a ni. Chhiatna kara chhanchhuah hna theihtawp chhuaha thawktute hmalakna chu fakawm a tih thu Larsap chuan a sawi bakah, ruah a la tlak belh zel avangin mipuite fimkhur tur leh a bikin chhiatrupna thlen theih maina bulhnaia awmte fimkhur lehzual turin a chah a ni.

Chief Minister Lalduhoma pawhin Social Media kaltlanga chhiatna tuartute a tawrhpuina thu sawiin, Mizoram hmun hrang hranga chhiatna thleng chanchin ten a rilru a luah reng tih a sawi a. Hmun hrang hrangah chenna In chan te, hmun him lama insuanchhuah ngai te an awm tih sawiiin, mi tlawmngai tam takten tanpui ngaite tanpuina an pe mek tih a sawi a, an chungah lawmthu a sawi bawk. Chief Minister chuan chhiatna tuar zawng zawngte tan a tawngtai bakah sawrkar chuan chhanchhuahna leh chhawmdawlna lamah a tih theih apiang a ti zel dawn a ni, a ti bawk.