Chief Minister hovin sawrkar mi pawimawh ten Mizoram-a chhiatna thleng an sawiho

Fur ruahtui tla avanga Mizoram hmun hrang hranga harsatna thleng chungchang ah nimin khan Chief Minister Lalduhoma hovin CM Conference Hall-ah thutkhawm neih a ni a, Minister leh Official pawimawh te bakah District Bawrhsap ten Video Conference hmangin an zawm a ni.

He thutkhawm ah hian District hrang hranga Bawrhsap te chuan an District dinhmun tarlangin Department hrang hrangte pawhin an dinhmun an tarlang a. Disaster Management & Rehabilitation Department chhinchhiah chinah hmun 211-ah leimin a awm a, In chim 60 awmin In rauhsan 69 a awm a, kawng ping hmun 83-ah awmin Retaining Wall chim 4, Electric ban tlu leh lei tlahniam engemaw zat awmin mitthi 4 an awm tawh a. Tuilian report pawh a awm nual a. Chhiatna thleng report hi meeting lai ngei pawh hian a la awm belh zel a ni.

PWD enkawl kawng hi hmun 21-ah pingin, Serchhip, Thenzawl leh Sialsuk vela khualzin tangkhangte chhuah theihna turin chak taka hna thawh mek a nih thu tarlan a ni a. Power & Electricity Department tarlan danin 33 KV Sub-Station pasarih (7) a chhia a, Mizoram pumpui hmun thuma thena hmun khat aia tam mahin harsatna an tawk mek a. A siam that hna hi thawh reng a ni a, khua a that chuan ni hnih thum chhunga an siam vek theih an inbeisei a ni. PHE Department chuan an chhinchhiah chinah hmun 50 velah chhiatna report an dawng a. Kolasib Tui pump khawl, Keitum-ah Solar Pump khawl leh Hnahthial pump te chu tuilianin a chim a, Line chhia hmun engemaw zatah a awm bawk. Supply Department lam chuan Monsoon Stock an nei zo hman a, harsatna thleng lo turah ngaih a ni.

He Meeting hian hmun hrang hranga chhanchhuahna hna thawktute, khualzin tangkhang duat taka lo tanpuia, eitur leh riahna lo ngaihtuahsaktute zawng zawng chungah lawmthu sawiin, zonun zemawi lantir a, tanpui ngaite lo tanpui zel turin a ngen a. District capital te inkalpawhna leh Airport kawng ngaih pawimawh hmasak nise, DDMA ten chak taka hna an thawh zel theih nan a rang lama Fund pekchhuah zel nise, chhawmdawlna (relief fund) pawh a ranglama pekchhuah zel nise an ti a. Chhiatna thlenna hmun umzuina lam chu DM&R ngaichang chunga kalpui zel nise, Central sawrkarah harsatna hrang hrang te report fel fai taka thehluh thuai nis, an ti bawk. Chhiatna thleng tam tak hi mihring siam (man made) atanga lo intan nia a lan thin avangin, hemi kawngah hian khauh lehzuala kal tha an tih thu sawilan a ni a, chhanchhuahna lam thiam neih tam deuh deuh a tul thu sawi a ni bawk.