Bairabi-Sairang Rel kawng peihfel a ni tawh

Northeast Frontier Railway-a Chief Public Relation Officer Kishore Sharma chuan Bairabi atanga Sairang thlenga Rel kawng siam chu engkim peihfel a ni tawh tih a sawi a, June ni 11 thleng enchhin a nih dawn thu leh July thla atanga service tura ruahman a ni tih a sawi.

Akashvani palai nen an inkawmna ah he thu hi sawiin NFR-a Chief Public Relation Officer Kishore Sharma chuan Rel tlan chhin tir chu Sairang Rel Station leh Hortoki inkarah neih anih thu leh he enchhinna ah hian Rel hi vawithum tlan chhin tir a ni tih a sawi a, he Railway line hlawhtling taka an zo thei chu Mizoram tân hlawhtlinna rahbi pawimawh tak a nih thu leh kumin July thla ah hi chuan a nihna tur ang taka hman theih an beisei thu a sawi bawk.

India ram zalen hnua a vawi khatna atan Aizawl dai, Sairang thleng tura Rel kawng siam hi Sawrkar laipui hmalakna pawimawh, Act East Policy tihhlawhtlinna pakhat niin, inkalpawhna tha leh tlawm bakah sum leh pai dinhmu tihhmasawnnana hmarchhak State te thlunzawm chu a tum ber a ni a, he Rel kawngah hian Station pali: Hortoki, Kawnpui, Mualkhang leh Sairang-Sihhmui Station awm tura ruahman niin, Leiverh 32, Lei lian 55 leh Lei te deuh 89 a awm dawn a ni.