India rampum-a a thlawna thisen pe tha zual zingah Mizoram a tel mek

Mizoram chu rampum huapa a thlawna thisen pe tha zual zingah a tel mek a, Mizoram bikah Lunglei Civil Hospital Blood Bank chu nikum (2024) April thla atanga kumin (2025) March thla thlenga a thlawna thisen pek tam berna niin, a thlawna thisen pek zat hi zaa 99.87 a tling a ni.

Akashvani News zawhna chhangin Association for Voluntary Blood Donation (AVBD) Vice President K. Zothanpara chuan India ram pumah thisen pe tha ber State hriat theih ni chiah lo mah se, Mizoram chu a pe tha ber emaw, a dawttu emaw a nih a rin thu a sawi a. Nikum October ni 1-a National Voluntary Blood Donation Day-ah khan Rajasthan khawpui Jaipur-a India Blood Donation NGO Conclave-ah Ministry of Health & Family Welfare leh National Blood Transfusion Council Mizoram chu India hmarchhak State zinga a thlawna thisen pe tam ber chawimawina hlan a lo nih tawh thu a sawi a ni.

Kumin chhunga Mizoram-a thisen pek tawh zat hriat theih ni rih lo mahse, MSACS Blood Safety Division data thar berah chuan nikum 2024 April thla atanga kumin March thla thleng khan Mizoram pumah thisen Unit 34,752 pek a ni a, chung zinga Unit 32,566 chu pek bik nei lova a mamawh apiang ten an hman tura a thlawna pek, Voluntary Donation a ni a. A thlawna thisen pek zawng zawng hi za-ah 93.71 a tling a ni. Lunglei Civil Hospital chu hemi chhunga thlawna thisen pek tam berna niin, a thlawna thisen pek zat chu zaa 99.87 a tling a. Christian Hospital, Serkawn in dawtin zaa 98.04, Synod Hospital, Durtlang-ah zaa 97.71, Serchhip District Hospital-ah zaa 97.67, Siaha District Hospital-ah zaa 96.88, Champhai District Hospital-ah zaa 95.11, Kolasib District Hospital-ah zaa 93.85, Civil Hospital, Aizawl-ah zaa 93.43, Mamit District Hospital-ah zaa 92.31 leh Lawngtlai District Hospital-ah zaa 75.27 te a ni.

Kumtin June 14-a hman thin ‘World Blood Donor Day’ chu kumin ah hian Inrinni, Sawrkar Pisa Chawlh-ah a tlak avangin Mizoram-ah chuan Vawiin, June ni 13 hian AVBD leh MSACS huaihawtin Mizoram hmun hrang hrangah hman a ni dawn a, he hunah hian thisen petute chawimawina hun hman tura ruahman niin pawl leh mimal thisen pe tam te chawimawina hlan an ni thin a. Serchhip-ah pawh Vawiin chawhnu dar 1:00 hian AVBD Serchhip Branch leh Serchhip District Hospital Blood Bank te buatsaihin Govt. Higher Secondary School, Serchhip-ah hun hman a ni anga, he hunah hian thisen pek chungchang inzirtirna neih a nih dawn bakah sawrkar kum liamta chhunga pawl hming-a thisen pe te hnenah chawimawina hlan a ni bawk ang.