Mizoram ti hring tura beihpui thlakna atan Green Mizoram Day 2025 hman a ni
‘Ruah tui khawl nan thing i phun ang u’ tih thupui hmanga Thenzawl Golf Course-a Green Mizoram Day hman ah hian State Level Sub-Committee on Green Mizoram Day Chairman leh Forest Minister Lalthansanga chuan Mizoram-a Green Mizoram Day lo hman chhoh tan dan sawiin, thingtiak pawh nuai 46 chuang phun a nih tawh thu a sawi a. Amaherawh chu kan thingtiak phun te chu tereuh te te a nih thin avangin a puitling erawh a tam tawk lo tih sawiin, tunah chuan kalphung thlakin thingtiak lian deuh leh a nung ngei tura ngaih te phun a nih tak thu a sawi a, “Thingtiak kan phun anga, kan enkawl zui anga, a puitling ngei tur a ni tih hi kan kalphung tur a ni tawh,” a ti.
Environment, Forests & Climate Change Minister chuan Mizoram chhungah ramngaw kan tihchereu nasat lutuk avangin tuihna a tlem tial tial a, kan pi leh puten sik leh sa an thliar dan pawh tunah chuan hman hleihtheih a ni ta lo tih sawiin, “Hei hi neitu thinlung pu lova mikhual ang maia kan ramngaw te kan enkawl vang a ni,” a ti a. Green Mizoram Day hi rilru leh tih takzeta hmang turin mipuite a chah a; thing leh mau leh nungchate te humhalh a, thingphun uar tur te, bawlhhlawh paih dan pawh fimkhur turin mipuite a fuih a. Mnizoram-ah ramngaw hring ala tam thu sawiin, amaherawh chu ramngaw tha erawh a tlem tawh thu a sawi a, hei vang hian ramngaw humhalh kawngah tan kan lak a tul thu a sawi bawk.
Nimin-a Green Mizoram Day puala hun hman ah hian Environment, Forests & Climate Change Minister hian kumin Thal chhunga kangmei venna kawnga hma la tha thlanchhuah District te hnenah lawmman a sem a, Lungei District chuan lawmman pakhatna dawngin Serchhip District in pahnihna leh Aizawl District in lawmman pathumna an dawng a ni.
Serchhip District-a kumin a kangmei venna kawnga tithate hnenah lawmman semna neih nghal niin Leng khua in lawmman pakhatna dawngin Zote South in pahnihna lawmman leh Ngentiang khua in lawmman pathumna an dawng a. Ramsa leh nungcha humhalhna kawnga thawk tha te leh Mizoram-a thing leh mau tipung tura hma la tha pawl hrang hrang te hnenah lawmman sem ni bawkin Zuchhip YMA, Sairep Village Community leh Serchhip Sub-Hqrs. YMA te hnenah Waiting Shed sakna tur Rs. 83,000/- sanction Order hlan a ni.
Green Mizoram Day puala hun hman hi Principal, Chief Conservator of Forest (PCCF) Rajeev Kumar Tiwari IFS chuan kaihruaiin MZ Singson IFS, CF (CC) chuan Green Mizoram Day report pein hma an lakna te a tarlang a, Thenzawl DFO Dr. R. Lalnunrenga chuan lawmthu sawiin hun a hmang bawk.
Mizoram ti hring tura beihpui thlakna hi kum 1998 khan ‘Green Aizawl Day’ ti a bultanin, kum 1999-ah ‘Green Mizoram Day’ tia thlakin Mizo-ram pumah hman zui a ni ta a. Kum 2014 atang khan June ni 11 chu ‘Green Mizoram Day’ atan Mizoram Sawrkar chuan puangin kumitin hemi ni hian hman a ni ta a. He ni denchhen hian Mizoram chhung hmun hrang hrangah thingtiak phun thin niin Thingtiak nuai 46 chuang phun a lo ni tawh a ni.
Nimin-a Green Mizoram Day puala hun hman a nih hnu hian Thenzawl Golf Course chhungah thingtiak phun chhunzawm nghal a ni a, he huna tel zawng zawngte tan thingtiak phun tur chhawpchhuah niin hmun hrang hrangah Office leh School ten thingtiak thahnem tak an phun bawk a ni.
Comments
Post a Comment
I ngaihdan i sawi hian mipui ngaihdan i tarlang a ni!