Hortoki - Sairang Rel kawng endik chhunzawm a ni

Commissioner of Railway Safety (CRS) Sumeet Singhal chuan Hortoki leh Sairang inkar Rel kawng chu a ni thumna atan nimin khan a him tawk leh tawk loh a endik chhunzawm.

Northeast Frontier Railway (NFR)-a Mizoram awmchiltu Deputy Chief Engineer (Construction) Harjemal Meena sawi danin Zirtawpni atang khan CRS Sumil Singhal hian Hortoki leh Sairang/Sihhmui Rel chawlhhmun inkara Rel kawng siam zawh tawh chu a him leh him loh a endik tan a. Ngawrh takin a thawhpuite nen endik hna hi an thawk chhunzawm zel a. Naktuk Thawhlehni khian endik hna hi zawhfel theih beisei a ni a. Endik hna zawh fel a nih hnu, ‘a him ngei e’ tih fiaha Ministry of Railways thuneitu sangte hnena thehluh a nih hunah Rel hi Bairabi atanga Sairang/Sihhmui thlengin a tlan thei tawh dawn a. July thla tawp lamah hawn theih beisei a ni.

Hemi hma hian Sumeet Singhal hian Bairabi leh Hortoki inkar Rel kawng hi nikum July thla chawhnu lam khan a him leh him loh endik tawhin August thla khan a him tawk tih a fiahna a thehlut tawh a. Tuna a endik hi hemi kawng KM 51 chuang endik hna a zawhna tur a nih thu NFR-a Chief Public Relation Officer (CPRO) Kapinjal Kishore Sharma chuan a lo sawi tawh a. Nilaini khan Rel bungraw phur tlan chak theih zawng tur enchhin a lo ni tawh a. Hemi ni hian darkar khata km 35 leh 50-a chak a tlantir chhin a ni a. Darkar khata km 110 tlantir chhin erawh chu ti rih lovin naktuk-ah tlan tir chhin tur a ni ang.