Home Minister in Thaidawr tlang chungchang sawipui

Home Minister K. Sapdanga chuan nimin khan Mizo Zirlai Pawl (MZP) General Hqrs. hruaitute kawmin Phuldungsei khua Thaidawr tlang pan chhohna kawng sir-a Tripura Sawrkarin Guest House an rawn sak chungchang leh Tripura sawrkar hmalak dan an sawiho.

He inkawmna ah hian Home Minister K. Sapdanga chuan MZP ten ram leh hnam veia amah an finchhuah thin leh theih ang anga hma an la thin chu lawmthu a lo hrilh a. MZP hruaitute chuan Home Minister hnenah hian Phuldungsei khaw bula Thaidawr tlang pawnchhohna turah Tripura sawrkar-in Guest House cheng nuai 300 man an sak mek thu leh Tripura State Rifle-te an duty reng thu sawiin, Mizoram State Police-te pawh duty nghal se an duh tih an hrilh a. Hei bakah hian Mizoram chhunga Tripura sawrkar-in buiding an sak mek, MZP-in a ngaimawh em avanga a hmuna an lo tlawh tawh thu sawi nawn lehin, tunhnaiah mi tu tih hriat loh ten an beih hnuah pawh sak chhunzawm an tum leh chu theihtawp a dodal turin Home Minister hi an ngen a ni. 

He hunah hian Home Minister chuan MZP duhdan angin, Kawnpui ‘M’ atangin Thaidawr tlang panchhohna ah Mizoram IR te dah phei a ni ang tih sawiin, hmalak mek a nih thu a sawi a, Tripura Tourism Minister nen an inbiak thu pawh sawiin, Guest House sak chu chhunzawm tawh lo tura hrilh thu a sawi a. Official Level-ah sawiho tura an ruahman thu a sawi bawk a ni. Home Minister chuan, Tripura State Rifle ten Thaidawr tlang pan chhohna turah Check Gate an lo siam ve ngawt pawh thiat nghal tura an hrilh thu a sawi a. Phuldungsei khawtlang hruaitute hnen atanga thu an dawn danin Check Gate hi thiah nghal a ni tih MZP chuan an sawi bawk a ni.

MZP hruaitute chuan Home Minister hmalakna avangin lawmthu an hrilh a, Jampui tlangdunga Mizo mipuite leh Mizoram khua leh tuite venghim tura theihtawp chhuah zel turin an ngen nghal a. Ramri kalpawhna kawngpuite chu tun aia ngaihsak lehzual turin an ngen bawk a. Ram leh hnam tana sawrkar hmalaknate chu theih ang anga an thlawp zel tur thu an hrilh bawk a ni.