Chief Minister's Bana Kaih Inventor's Challenge lawmman dawngtute Seed money hlan an ni

State Level Chief Minister's Bana Kaih Inventor's Challenge lawmman dawngtute hnena an bultanna tur (seed money) hlanna chu nimin khan Chief Minister Lalduhoma hovin hman a ni.

Hemi puala CM Conferenve Hall-a hun hman ah Chief Minister chuan kan pi leh pute hun atang tawhin hmanrua tam tak kan lo hmuchhuak ve tawh tih sawiin, “Herawt te, Hmui te, Puantahna te leh thil dang dang. An technology pawh kha a lo sang viau mai,” a ti a. “Thangtharte hian anni aia tha leh changkang zawk hi kan la siam hlei thei lo zawk te hian a lang. Darkhuang thar te, Dar thar te hi kan siam leh tawh chuang lo reng reng a. Thangthar fing zawka ngaihte hian tan kan lak a tul hle,” a ti. Chief Minister chuna ‘Inventor’ ni turin lehkhathiam nih a tangkai rualin, lehkhathiam lem lo inventor ropui tak tak hi khawvelah tam tak an awm tho tih pawh sawiin, “Mi in hmanraw tangkai leh mihringte tana tangkai siam a duhna, midangte tanpuitu nih duhna, awlsamna min thlen thei thil thar hmuhchhuah duhna zawk khan inventor-ah min siam thin. Chutiang rilru pu mi chu tam deuh deuh se kan duh,” a ti bawk.

Mizoram-ah innovator leh inventor tam tak kan nei ang tih an rin thu pawh Chief Minister Lalduhoma chuan sawiin, “Chung mite dap chhuak a, patent thlenga tihpui hi he challenge in a tum a ni,” a ti. Innovator leh inventor te chu kal zel tura chahin, challenge a nih ang ngeiin midangte pawhin he kawng hi rawn zawh ve zel se an duh thu a sawi bawk.

Nimin-a he hun hman hi Planning Department-a Commissioner Vanlaldina Fanai chuan kaihruaiin kumin March thla khan he intihsiakna lawmman dawngtute puanna leh lawmman hlanna hi neih a lo ni tawh a, intihsiakna buatsaih leh lawmman semah duh tawk mai lovin an umzui zel tih sawiin, “Hmasawnna min thlenpuitu nihtir ngei kan tum a ngai a ni,” a ti.

Seed Money semna hunah hian mi 10 hnenah Seed Fund hi pekchhuah a ni a, B. Lalhruaitluanga (Small LED display for public carrier system) chu Rs. 50,000/- hlanin Lalhlimawma (E-commerce) chu Rs. 3,00,000/-; Lalruatfela Chhakchhuak (Tlangau-waste management) Rs. 1,50,000/-; Fayek Ahmed (Vehicle accident monitoring) Rs. 15,000/-; HV. Lalzuimawia (Bamboo Flattening machine) Rs. 8,00,000/-; Ramdinmawia (Hmarcha chi lakna khawl) Rs. 5,00,000/-; Chhuanmawia (Puantahna Khawl-Zoloom) Rs. 4,00,000/-; Rodinpuia (Automation system) Rs. 5,00,000/-; Sunday Lalbiaknia (Online Book Store) Rs. 4,00,000/- leh Hillstech (Precision farming) Rs. 3,00,000 te hlan an ni.