ECM Kohhran Tipi Ferry hmalakna in Lei dawh tum

Siaha District-a Siaha leh Lawngtlai inkarah Tisopi Lei chu ECM Kohhran Tipi Ferry hmalakna in tunkar tir atang khan dawh tan a ni a he Lei hi a bikin Amôtlah tlangdung khaw 4 - Tipi Ferry, Riasika, Amotlah leh Thiahra khua ten khawpui lama chak an lakna kalkawng a ni.

Helai tlangdung khaw 4 hi Chhimtuipui lui leh Tisopi lui in a karcheh a, Fur tuilen laiin Lei a awm loh avangin ei leh in lakna kawngah an buai hle thin a. Kum 2023 khan Bailley Bridge dawhna turin hmalak a ni a. Thir dah turin Contractor hran a ngaih avangin Tender hran chhuah a ni a, kumin 2025 Thal chhunga dawh zawh hman an beisei laiin Contractor te hian hna an tan thei ta lova, Lei awmchhun Seasonal Bridge chu tuilian in a lak tak avangin inkalpawhna a awm ta lo a ni.

ECM Tualchhung Kohhran Tipi Ferry chuan Kohhran sum atanga Lei dawh turin hma an la tih an hriat hian Bialtu MDC leh District Administration (DM&R) lam te hmalakna in cheng nuai khat chu sanctioned a ni a, Lei hi cheng nuai 2-3 vel senga dawh turin an in ngai a ni.