Kum 11 chhunga hmalakna pholanna buatsaih

Kum 11 chhunga BJP sawrkarin ram tana rawngbawlna, rorelna tha leh miretheite ham-thatna a thawh tawh hrang hrang phochhuahna, Exhibition chu nimin khan Aizawl Upper Republic-a Mizoram BJP Office Hall-ah BJP National Secretary leh Spokeperson Anil Antony chuan a hawng.

Exhibition hawnna inkhawm tawi ah thusawiin Anil Antony chuan Prime Minister Narendra Modi-a kaihhruai NDA sawrkar chuan kumin May thla khan a kum 11 chhung sawrkarna a zofel tih a sawi a, kum 11 liamta chhung khan ram chhungah inthlak danglamna nasa tak a thleng niin a sawi bawk a. He Exhibition-ah hian kum 11 liamta chhunga ramchhung hmun hrang hranga hmasawnna leh inthlak danglamna thleng te phochhuah a ni tih sawiin, Prime Minister Narendra Modi-a kaihhruai sawrkar hnuaiah hmasawn hnathawh hrang hrang thawh mek a ni a, hmarchhak bialah pawh thawh mek niin, Mizoram-ah chuan cheng vbc. 8,400 chuang sengin Rel kawng kilomtre 52 a sei siam a ni, a ti a. Prime Minister Narendra Modi kaihhruaina a hmalakna tarlanna Exibition buatsaih hi India ram chanchin, hmasawnna kawng a zawh dan hrang hrang te hriatfiah theihna a nih avangin Mizo mipuite chu tlawh turin a sawm a ni.

Exhibition hi tun thla chhungin nitin chawhma dar 9:30 atanga tlai dar 4:00 thleng tlawh theih a hawn a ni dawn a. BJP Mizoram State President Vanlalhmuaka pawhin Exibition ah hian Prime Minister Narendra Modi kaihhruai kum 11 chhunga hnathawh an tarlan te chu tlawh theuh turin Mizo mipui te a sawm a ni.

Tarlan tawh angin BJP National Secretary Anil Antony hian niminpiah khan Aizawl Press Club-ah thuthar thehdarhtute kawmin kum 11 chhunga Prime Minister Narendra Modi kaih-hruai Sawrkar hmalakna hrang hrangte chu mipui hriat turin a lo puangzar tawh a ni.