Aizawl khawpui chhunga tunhnaia lei chet nasatna hmun Minister-in tlawh

Disaster Management & Rehabilitation Minister Prof. Lalnilawma leh Horticulture Minister C. Lalsawivunga te chuan tunhnaia ruahsur nasa avanga Aizawl khawpui chhunga lei chet nasat deuhna hmun hrang hrangte nimin khan an tlawh.

Minister pahnihte hian Aizawl khawpui chhunga veng 6 - Venghlui, Dawrpui (Temple - Vaivakawn road), Mission Veng Kawltheihuan, Mission Vengthlang (Shalom Baptist Biak In - Tlawng road), Kulikawn Vengthlang leh Vaivakawn Zohnuai te an tlawh a. Venghlui lei chetna hi Venghlui Hmar Veng Dak Inpui thlangah niin kilometre 2 bial vel che in chhungkaw 21 in an chenna In luah ngam lovin an riah chhuahsan a ni. Dawrpui (Temple - Vaivakawn) road lei chetna hi Assam Rifles Biak In thlang a ni a, Temple - Vaivakawn road kawng thlang lam leh Dawrpui Kawngpui an a in engemawzat chu luah ngam loha rauhsan a ni bawk. Mission Veng Kawltheihuan lei chetna ah hian a bula concrete In pakhat luah ngam lohin rauhsan a ni a, a thlang lama mimal Insak lai pawh khawih chhunzawm ngam lohin a awm a. Mission Vengthlang-a lei a chetna hi Shalom Baptist Biak In - Tlawng road-ah a ni a, chhungkaw 15 chuangin an chenna In luah ngam lovin an inthiarchhuak bawk a ni.

Kulikawn Vengthlang-ah hian In 9 a khawih a, chhungkaw pakhat chu In luah ngam lovin an riakchhuak bawk a, Vaivakawn Zohnuai-ah hian khawtlangin hnatlang an ko a, lei che hian In 6 khawih tawhin chhungkaw 15 an inthiarchhuak tawh a ni.

DM&R Minister Prof. Lalnilawma chuan tunhnai ruahsurin Aizawl khawpui mai bakah Mizoram hmun hrang hranga chhiatna a thlen chu pawi a tih thu a sawi a, harsatna tawktu chhungkua te a tawrhpui thu a sawi. In sa tur leh in sa tawhte pawhin tuichhia leh thli paihna tuihawk luankawr tha tak siam a pawimawh thu a sawi a, sawrkarin In satute zawm tur dan a siam chu tha taka an zawm a pawimawh thu sawiin, tuna Aizawl khawpui chhunga lei chet nasatna hmun hrang hrang ami an tlawhte chu sawrkarin Joint Inspection Team endik turin ruahmanna an siam thu leh Vawiin la la hian an chet chhuah nghal thu a sawi a, an report pawh a rang thei ang bera thehlut tura an inhrilh thu a sawi bawk.

Minister C. Lalsawivunga pawhin ruahtui lo dawnsawn kawngah fimkhur a tul thu leh tuihawk luan kawr mumal tak neih theuh a pawimawhzia sawiin, Vaivakawn-ah hian bialtu MLA leh Minister Lalnghinglova Hmar chuan Ministes te hi a lo dawngsawng bawk a ni.